25 sakavika zatrymali Jaŭhiena D., dyrektara viaskovaj škoły z-pad Šarkaŭščyny.
59-hadovy D. pracavaŭ u škole ŭ vioscy Stanisłavava. Piedahahičny staž — bolš za 20 hadoŭ. Pačynaŭ fizrukom, dasłužyŭsia da dyrektara — pasadu kiraŭnika škoły zaniaŭ prykładna 15 hadoŭ tamu, kažuć miascovyja.
Vykładaŭ D. fizkulturu i čarčeńnie.
U samoj škole paćviardžajuć fakt zatrymańnia dyrektara, ale kamientavać historyju admaŭlajucca.
Piedahohi z susiednich viosak kažuć, što D. byŭ na dobrym rachunku, nijakich prablem nikoli nie mieŭ. Žyŭ u Šarkaŭščynie, u vioscy tolki pracavaŭ. Žanaty, maje darosłaha syna. Žonka piensijanierka, raniej pracavała ŭ rajvykankamie.
«Niadaŭna, 23 sakavika, Jaŭhien pachavaŭ maci. Ja jaho bačyŭ na pachavańni, zdajecca, nijakich prablem nie było», — raspavioŭ «Našaj Nivie» brat dyrektara.
Ale praz paru dzion D. uziali pad vartu. U Śledčym kamitecie paćvierdzili: mužčynu zatrymali 25 sakavika. Na jaho zaviali kryminalnuju spravu, padazrajuć u hvałtoŭnych dziejańniach seksualnaha charaktaru ŭ dačynieńni da niepaŭnaletniaha.
Viadoma, što pakul paciarpiełych dvoje. Heta školniki, vučni Stanisłavaŭskaj škoły.
Pa infarmacyi «Našaj Nivy», adzin z paciarpiełych raspavioŭ maci, što dyrektar jaho niekalki razoŭ «macaŭ» u kabiniecie. Žančyna pajšła ŭ milicyju.
Pryčym, pa słovach školnika, upieršyniu dyrektar pačaŭ zalacacca jašče kali chłopčyk vučyŭsia ŭ 5—6-m kłasie. Zatym na niekalki hadoŭ mužčyna spyniŭsia, i voś niadaŭna ŭsio pačałosia iznoŭ.
Praŭda, u hetuju historyju niekatoryja viaskoŭcy admaŭlajucca vieryć.
«Jon dyrektar ad boha. Ja dumaju, što heta niapraŭda, — kaža adna z žycharak Stanisłavava, u toj samaj škole ŭ jaje vučacca dźvie dački. — Ja sama nie vieru ŭ heta».
Starejšaja dačka surazmoŭcy vučycca ŭ 9 kłasie. Jana taksama paŭtaraje za maci: «I ja liču, što heta niapraŭda. Jon byŭ narmalny dyrektar i narmalny nastaŭnik, zaŭsiody dobra staviŭsia, amal nie svaryŭsia».
Ciapier piedahohu pahražaje ad 8 da 15 hadoŭ pazbaŭleńnia voli.
