Leanid Prančak — papularny ŭ 1990-ja paet, aŭtar vieršaŭ i dla darosłych, i dla dziaciej.
Na słovy Prančaka, naprykład, napisana viadomaja pieśnia «Cik-tak chodziki». Ale apošnim časam paet u asnoŭnym zaniaty biaskoncymi sudami z hazietami, časopisami i vydaviectvami.
Čytajcie. 50 spraŭ Leanida Prančaka: jak adzin paet paralizavaŭ pracu Viarchoŭnaha suda
Paet manitoryć usie srodki masavaj infarmacyi, padručniki i dapamožniki, karaciej, usie drukavanyja vydańni, u jakich mohuć uspłyć radki za jaho aŭtarstvam. Zatym Prančak idzie ŭ sud i padaje pazoŭ: maŭlaŭ, parušyli aŭtarskija pravy, dajcie hrošaj.
Sudziŭsia jon — ci sprabavaŭ sudzicca — z usimi zapar: i z «Našaj Nivaj», i «Sovietskoj Biełoruśsijej», i z błohierami. I niaredka vyjhravaŭ.
Viarchoŭny sud apublikavaŭ rašeńni pa piaci spravach za 2019 hod, pazoŭnikam u jakich vystupaŭ Prančak. Va ŭsich paet vyjšaŭ pieramožcam. Što heta za historyi?
Achviaraj paeta staŭ vydaviecki dom «Źviazda». Hałoŭny redaktar Pavieł Sucharukaŭ admoviŭsia prakamientavać «Našaj Nivie» padrabiaznaści kanfliktu. Ale viadoma, što padstavaj da pretenzij staŭ navat nie redakcyjny materyjał, a list čytački, jaki byŭ apublikavany ŭ «Źviaździe».
U tym liście žančyna raspaviała pra svajho małoha syna Alhierda, jaki viedaje pieśniu «Cik-tak chodziki, mnie čatyry hodziki».
Maleńki Alhierd jašče nie viedaje, što ŭzhadvańnie pieśni «Cik-tak chodziki» kaštuje minimum 510 rubloŭ. Fota zviazda.by
Prančak dziejničaŭ standartna: pajšoŭ u sud, zapatrabavaŭ 20 bazavych vieličyniaŭ za vykarystańnie ŭryŭka ź jaho vierša. Adkazčyk ža śćviardžaŭ, što nie viedaŭ pra aŭtarstva Prančaka i paličyŭ vieršavanyja radki narodnaj tvorčaściu.
Sud vyrašyŭ, što vykarystańnie čatyroch radkoŭ prančakoŭskaha vierša — heta parušeńnie aŭtarskich pravoŭ. «Źviazdu» abaviazali spłacić Leanidu Prančaku 510 rubloŭ kampiensacyi.
U kastryčniku 2018 hoda Prančak zaŭvažyŭ u haziecie «Minskaja praŭda» materyjał pra biełarusaŭ, jakija žyvuć u Irkuckaj vobłaści Rasii, ale namahajucca nie hublać suviazi ź biełaruskaj movaj i tradycyjami.
«Ja apublikavała fotazdymak dziaŭčynki. Dzieci ź viaskovaj škoły vystupali ŭ miascovym muziei, i dziaŭčynka vykonvała pieśniu na słovy Prančaka «Cik-tak chodziki». Čatyry radki ź pieśni ja vykarystała jak podpis pad fota», — raspaviała aŭtarka artykuła Śviatłana Kirsanava.
Hetaja dziaŭčynka žyvie ŭ Rasii, ale lubić Biełaruś i vieršy Prančaka. A Leanid Prančak žyvie ŭ Biełarusi i lubić hrošy. Fota Śviatłany Kirsanavaj.
Prančaku iznoŭ ža chapiła tych čatyroch radkoŭ. Pazoŭ u sud, pasiadžeńnie, sud iznoŭ na baku aŭtara. Vyrak — kampiensacyja ŭ 510 rubloŭ Prančaku i standartnyja 24,5 rubla pošliny.
Aproč taho, u knihach niekalkich vydaviectvaŭ Prančak zaŭvažyŭ uryŭki sa svaich vieršaŭ. Kaniečnie, padaŭ u sud. Sud vyrašyŭ: aŭtaru zapłacić. Za dva vieršy aŭtar prasiŭ 510 rubloŭ kampiensacyi (pa 10 bazavych vieličyń za tvor). Zaklučyli miravoje pahadnieńnie: vydaviectva pahadziłasia spłacić paetu tyja 510 rubloŭ.
U inšym vydaviectvie vypuścili dapamožnik dla piedahohaŭ daškolnaj adukacyi. U knizie taksama vykarystali častku vierša Prančaka. Paet pajšoŭ u sud, zapatrabavaŭ tyja ž 510 rubloŭ kampiensacyi. Kiraŭnictva vydaviectva namahałasia asprečyć pretenzii: maŭlaŭ, vykarystoŭvaŭsia vierš nie jak litaraturny tvor, a jak «ilustracyja mietadyčnaha materyjału». Ale sud staŭ na bok pazoŭnika i znoŭ prysudziŭ jamu 510 rubloŭ kampiensacyi.
Z treciaha vydaviectva Leanid Prančak «padniaŭ» až 1020 rubloŭ. Heta kampiensacyja za 4 vieršy, jaki ŭzhadali ŭ časopisie vydaviectva. Sud, jak zvyčajna, staŭ na bok Prančaka.
Takim čynam, za piać pazovaŭ Prančak atrymaŭ trochi bolš za 3000 biełaruskich rubloŭ. A kolki hetych pazovaŭ było i jašče budzie razhledžana!
