Fota Siarhieja Hudzilina
Kiraŭnik CVK Biełarusi Lidzija Jarmošyna ŭ intervju prahramie «Tydzień» na STB raspaviała, jakuju datu prapanoŭvaje dla prezidenckich vybaraŭ u 2020 hodzie, paviedamlaje Tut.by.
Termin prezidenckich paŭnamoctvaŭ zakančvajecca 30 žniŭnia 2020 hoda. Jarmošyna adznačyła, što 30 žniŭnia — heta dzień, kali ŭsie znachodziacca ŭžo pa asnoŭnym miescy žycharstva, u asnoŭnym.
«Bo praź dzień, 1 vieraśnia pačynajecca navučalny hod. U nas pracujuć usie ŭstanovy navučalnyja, užo jany adramantavanyja, a mienavita tam u nas raźmiaščajucca ŭčastki dla hałasavańnia. Tamu z punktu hledžańnia arhanizacyjnaj hetaja data absalutna prymalnaja. Z punktu hledžańnia viadzieńnia pieradvybarnaj ahitacyi jana taksama dobraja ŭ tym płanie, što jana stvaraje spryjalnyja klimatyčnyja ŭmovy dla praviadzieńnia mierapryjemstvaŭ na adkrytym pavietry: pikietaŭ i mitynhaŭ», - zajaviła kiraŭnik CVK.
Adzinaje, moža, kandydataŭ nie vielmi zadavolić hetaja data ŭ siłu taho, što mnohija vybarščyki ŭ pieryjad pieradvybarčaj ahitacyi buduć znachodzicca ŭ inšych miescach, dzieści ŭ adpačynkach, udakładniła jana.
Pry hetym Jarmošyna adznačyła, što pakul rana pra heta kazać. «Ja dumaju, što paśla vybaraŭ parłamienta ja, viadoma, abaviazkova pryjdu z dakładam da kiraŭnika dziaržavy, i my budziem abmiarkoŭvać razam z kiraŭnictvam parłamienta. Jany pryznačajuć vybary ŭ najbolš prymalny pieryjad i datu praviadzieńnia vybaraŭ prezidenckich », - skazała kiraŭnik CVK.
Nahadajem, parłamienckija vybary Jarmošyna prapanavała pravieści 17 listapada 2019 hoda.
