Tielehram-kanał NEXTA paviedamiŭ ab nadzvyčajnym zdareńni ŭ Viciebskaj 103-j desantnaj bryhadzie. Siońnia ranicaj mašynaj prycisnuła sałdata. U Minabarony i balnicy chutkaj dapamohi Tut.by paćvierdzili infarmacyju.
— Kamisija sił śpiecyjalnych apieracyj ažyćciaŭlaje pravierku ŭ suviazi z parušeńniem praviłaŭ ekspłuatacyi aŭtamabilnaj techniki vajennasłužačym terminovaj vajennaj słužby, u vyniku čaho atrymaŭ traŭmu jaho kaleha, — paviedamiŭ pres-sakratar Minabarony Uładzimir Makaraŭ. — Jamu akazana miedycynskaja dapamoha, jon špitalizavany.
Sałdat terminovaj słužby, jaki byŭ za rulom mašyny, znachodzicca ŭ vajskovaj častcy. Paciarpieły — u reanimacyi, jaho stan aceńvajuć jak ciažki, paviedamili ŭ Viciebskaj balnicy chutkaj dapamohi.
Za apošnija miesiacy heta nie pieršy vypadak, źviazany z traŭmiravańniem vajskoŭcaŭ u 103-j hvardziejskaj pavietrana-desantnaj bryhadzie, jakuju nazyvajuć pakazalnaj.
U śniežnia 2018 hoda staršy siaržant Alaksiej Ramanienka zahadaŭ małodšym pa zvańni zrabić kulok praź mietaličnuju aharodžu, pry hetym adnaho ź ich udaryŭ nahoj, a druhi vajskoviec padčas kulka złamaŭ klučycu. Ramanienku zvolnili ŭ zapas, pa kantrakcie jon prapracavaŭ prykładna paŭhoda, u dačynieńni da jaho zaviedieziena kryminalnaja sprava pa fakcie pieravyšeńnia ŭłady, spałučanaha z hvałtam.
