Kiraŭnik Biełarusi Alaksandr Łukašenka 23 krasavika sustrakaŭsia sa spartsmienami i trenierami zbornaj Biełarusi pa ciažkaj atletycy. Niadaŭna kamanda viarnułasia z čempijanatu Jeŭropy ŭ Batumi, dzie zaniała sumarna druhoje miesca.
Łukašenka prymaje zbornuju pa ciažkaj atletycy. Fota BiełTA.
«Ciažkaja atletyka ŭvachodzić u karali tych vidaŭ sportu, jakija prynosiać słavu. Heta vialiki vid sportu», — skazaŭ Łukašenka, jaki zapeŭniŭ, što całkam pahladzieŭ apošni čempijanat. Jon zajaviŭ, što sam sprabavaŭ zaniacca ciažkaj atletyka, ale ŭ jaho nie atrymałasia.
Trenier Valeryj Sizionak atrymaŭ z ruk Łukašenki miedal «Za pracoŭnyja zasłuhi», a spartsmiency Darji Navumavaj było prysvojena zvańnie «Zasłužanaha majstra sportu Biełarusi».
Paśla farmalnaj častki pačałasia niefarmalnaja, dzie atletaŭ častavali nie tolki čajem, ale i chlebam z sałam. Łukašenka daŭ nakaz čaściej užyvać hety pradukt.
Źviarnuła ŭvahu, što na sustrečy adsutničaŭ słavuty spartsmien, alimpijski čempijon Andrej Aramnaŭ. Heta spartsmien niaprostaha losu. U 20 hadoŭ jon bliskuča vyjhraŭ Alimpijadu ŭ Piekinie, ale paśla ŭ jaho pačalisia prablemy.
Alimpijski čempijon Andrej Aramnaŭ. Fota mlyn.by.
U tym ža 2008 hodzie jaho zatrymali za pjanaje kiravańnie aŭto, pazbavili pravoŭ. Ale jeździć na mašynie praz heta Aramnaŭ nie pierastaŭ. Jaho pazbavili prezidenckaj stypiendyi i dyskvalifikavali na dva hady. Kali Aramnaŭ viarnuŭsia, to na čempijanacie Jeŭropy ŭ Minsku jaho złavili nie na dopinhu, a za paleńnie marychuany.
Znoŭ była dyskvalifikacyja. U 2017 hodzie vyśvietliłasia, što Aramnaŭ prysudžany da 2 hadoŭ «chatniaj chimii» za čarhovaje pjanaje kiravańnie.
Sioleta Andrej čarhovy raz viarnuŭsia ŭ sport i adrazu ŭziaŭ srebrany miedal u Batumi. «Naša Niva» pacikaviłasia ŭ Aramnava, čamu jaho nie było na sustrečy z Alaksandram Łukašenkam.
«Tak atrymałasia, što adrazu paśla čempijanatu Jeŭropy ja ŭziaŭ bilety na adpačynak, u mianie jość roŭna 10 dzion na adpačynak. Sprava ŭ tym, što 2 maja ŭžo treba adnaŭlać treniroŭki da čempijanatu śvietu, u mianie vielmi surjoznyja płany na hetyja starty. A ja ŭžo nastolki stary, što mnie abaviazkova treba nasycić arhanizm soniečnymi i salonymi vannami. Ja ciapier znachodžusia ŭ našym prostym, zvyčajnym Jehipcie. Vielmi chacieŭ być na sustrečy z prezidentam, ale tak atrymałasia», — raskazaŭ nam Andrej Aramnaŭ.
