«Stvaryć taki prajekt natchniŭ asabisty niedachop u mientary, u niejkich realnych i kampietentnych paradach, jaki pieraśledavaŭ mianie ŭsio žyćcio», — kaža zastanavalnik płatformy Kirył Anochin.
Jak heta pracuje
Mentor.by zadumvaŭsia jak zručnaje miesca dla abmienu viedami. Na sajcie možna stvarać abjavy troch typaŭ:
— «Chaču navučycca». Patreba moža być jakaja zaŭhodna — ad «rana pračynacca» da «pahłybić viedy ŭ atamnaj fizicy».
— «Mahu navučyć». Raskazvajecie, jaki kurs, kansultacyju ci treniroŭku hatovy pravieści i na jakich umovach.
— «Padzieja». Paviedamlajecie pra adukacyjnuju imprezu, jakaja chutka adbudziecca: biznes-forum, lekcyja, dyskusija.
U katałohu abviestki raźbity pa katehoryjach: dzieci i siamja, dyzajn, pryhažość i zdaroŭje, mastactva, biznes i finansy dy inšyja.
Pakul bolšaść prapanavanych kursaŭ tyčacca moŭ, IT i školnych pradmietaŭ. Ale placoŭka pracuje tolki miesiac, naturalna, što prapanovaŭ budzie prybyvać.
Kab zručna było šukać toje, što patrebna mienavita vam, jość filtr pa rehijonach, umovach, farmatu i inšych kryterach. Pabačyć, jakija padziei adbuducca ŭ najbližejšy čas, možna ŭ raździele «Afiša».
Jakija viedy tut prapanujuć?
«My imkniomsia spałučyć standartnyja kursy — pa anhlijskaj movie, žyvapisie — z tym, čym mohuć dzialicca šarahovyja ludzi, śpiecyjalisty ŭ vuzkaj nišy. Jość, naprykład, prapanova navučyć hulać u fłorboł (chakiej na travie). Jasna, što tam nie budzie šmat vodhukaŭ i achvotnych, ale sama pa sabie prapanova kaštoŭnaja», — kaža Kirył Anochin.
Jak razabracca, što z kursaŭ varta ŭvahi? Možna aryjentavacca na sistemu rejtynhu — jaje buduć składać sami karystalniki: aceńvać uzajemadziejańnie padčas navučalnaj prahramy i jaje vyniki.
Na płatformie možna zadavać pytańni ci davać adkazy — takaja chutkaja anłajn-kansultacyja pa ŭsich śfierach viedaŭ.
Navošta heta treba?
Jak tłumačyć stvaralnik prajekta, meta Mentor.by — maksimalna pašyryć razumieńnie, što viedy — heta resurs, jaki treba zdabyvać, zachoŭvać i pieradavać inšym. A taksama ŭciahnuć u praces navučańnia nie tolki studentaŭ i repietytaraŭ. Płatforma moža być karysnaja ŭsim, chto adčuvaje niedachop viedaŭ i navykaŭ u peŭnaj śfiery, ale ci ihnaruje jaho, ci delehuje składanyja zadačy inšym.
Plus prajekt raźličany na tych, chto maje niejkija kampietencyi (ad pobytavych da ekzatyčnych), ale pakul nie ŭśviedamlaje, što imi možna dzialicca i atrymlivać ad hetaha vyhadu.
«Mała chto pra heta zadumvajecca, ale tvaje viedy kaštoŭnyja nie tolki dla ciabie. Isnujuć ludzi, jakim jany taksama patrebny. Čamu b nie padzialicca — za hrošy ci navat prosta tak? Navučańnie — heta niešta bolšaje, čym prosta pieradača viedaŭ. Heta ŭ tym liku pieradača staŭleńnia da spravy, peŭnych kaštoŭnaściaŭ», — adznačaje Kirył Anochin.
Niama ludziej, jakija viedajuć usio.
«Ci dastatkova vy vałodajecie zamiežnaj movaj, kab biez prablem kamunikavać padčas padarožžaŭ ci z kalehami ź inšych krain? Što nakont mary navučycca tančyć ci hulać u šachmaty? A ci chapaje vam kampietentnaści, kab paśpiachova vieści prajekty vašaha novaha zamoŭcy? Z adnaho boku, usiamu možna navučycca samastojna. Ź inšaha — chutčej i efiektyŭniej heta rabić razam z nośbitam viedaŭ. Heta asabliva aktualna dla ekskluziŭnych ci vuzkaśpiecyjalnych kampietencyj, zdabyć jakija samastojna čaściakom prosta niemahčyma, — ličyć stvaralnik prajekta. — Vidavočna, što novyja viedy — heta novyja pierśpiektyvy, bolš asensavanaje i nasyčanaje žyćcio. Heta raznastajnaść, źmieny, ruch».
Pierajści na Mentor.by i pahladzieć, chto što prapanuje
