Uviečary 16 maja ŭ Mahilovie źnik 22-hadovy inśpiektar DAI Jaŭhien Patapovič. Praź niekalki hadzin jaho znajšli ŭ lesie miortvym.
Pa mierkavańni Śledčaha kamiteta, daišnik ździejśniŭ suicyd.
Pra heta było abvieščana na pres-kanfierencyi.
Pa infarmacyi SK, Patapovič praihnaravaŭ paviedamleńni dziažurnaha i nie pajechaŭ na miesca DTZ. Jon pryjechaŭ u les, dzie pakončyŭ z saboj.
Ruki Patapoviča byli ŭ kajdankach. Ale śledčyja kažuć, što heta nie pieraškadžała jamu skarystacca zbrojaj.
Śladoŭ baraćby na ciele milicyjanta nie znajšli. Taksama paźniej stała viadoma, što inśpiektar adpraviŭ šerah suicydalnych paviedamleńniaŭ znajomym. A ŭ krasaviku Patapovič užo sprabavaŭ ździejśnić suicyd, paviedamili śledčyja.
U dzień trahiedyi jon nabyŭ u kramie drovy, rydloŭku i vadkaść dla raspalvańnia. Hetyja pradmiety paśla byli znojdzieny kala jaho cieła.
Z dapamohaj vadkaści inśpiektar spaliŭ svaje štany. Miarkujecca, što heta było zroblena, kab viersija ab zabojstvie była bolš pierakanaŭčaj.
Paviedamleńnie ŭ «Vajbier» Patapovič napisaŭ sam, taksama kab kalehi ŭspryniali jaho śmierć jak zabojstva.
Čytajcie: Što zastajecca niezrazumiełym u historyi z suicydam mahiloŭskaha daišnika
SK: daišnik sam spaliŭ štany pierad śmierciu
Chronika padziej
16 maja Patapovič byŭ adzin u piešym patruli. To bok jamu treba było dabracca da miesca DTZ ci ź inšymi supracoŭnikami na ich mašynie, ci «na paputkach». Zamacavanaha za saboj aŭto ŭ inśpiektara nie było.
Uviečary 16 maja Patapovič — pa papiaredniaj viersii — sieŭ u niejkuju mašynu. Bolš inśpiektara žyvym nichto nie bačyŭ.
Spačatku razhladałasia viersija, što inśpiektar sieŭ u mašynu na rasiejskich numarach da traich cyhan, bo sam jon paśpieŭ adpravić paviedamleńnie pra heta kaleham. Čornuju «Vołhu» šukali pa ŭsioj krainie, ale biezvynikova. Adnačasova ŭ mahiloŭskich rajonach Čapajeŭka i Hrabianiova prajšli masavyja zatrymańni cyhan. Žančyn pratrymali da 5 ranicy, mužčyn — kala sotni čałaviek — pakinuli na niekalki dzion pad vartaj.
A 17 maja mahiloŭski cyhanski baron Leanid Kazimiraŭ paviedamiŭ, što, pa jaho infarmacyi, zabojcu zatrymali — i heta nie cyhan.
Ale ž paźniej u toj ža dzień Śledčy kamitet abvierh słovy barona: u jakaści padazravanych pakul nikoha nie zatrymlivali. Taksama śledčyja paviedamili, što inśpiektar byŭ zabity strełam u hałavu. A viersija z «Vołhaj» bolš nie źjaŭlajecca pryjarytetnaj. Na nastupny dzień pačali adpuskać z-pad varty zatrymanych cyhanoŭ.
Paźniej śledčyja paviedamili, što prahlad videa z vuličnych kamier nie vyjaviŭ anijakaj čornaj «Vołhi».
A na bryfinhu 20 maja paviedamili, što Jaŭhien Patapovič skončyŭ žyćcio samahubstvam.
Patapoviča pachavali ŭ Mahilovie 18 maja. Na raźvitańnie ź inśpiektaram pryjšło kala 2000 čałaviek.
Ministr unutranych spraŭ Ihar Šunievič na pachavańnie lejtenanta nie pryjechaŭ.
