A voś skaračeńnia terminovaj słužby pakul nie płanujecca. Jak i pierachodu da prafiesijnaj armii.
«Nivodnaja kantraktnaja armija jašče nie spraviłasia ni z adnoj vajnoj. Zaŭsiody ŭ bitvach pieramahaŭ narod, jaki prychodziŭ z zapasu» — zajaviŭ pradstaŭnik Hienštabu Minabarony pałkoŭnik Andrej Murašoŭ u časie online-kanfierencyi na sajcie BIEŁTA. Pa jaho słovach, pierachod całkam na kantraktnuju słužbu niemetazhodny i ekanamična nie vyhadny.
Nie płanujecca i skaračeńnie terminovaj słužby. Siońnia ŭ biełaruskim vojsku słužać 18, 12 i 6 miesiacaŭ.
Alternatyŭnaja słužba budzie. Adpaviedny prajekt raspracavany Ministerstvam pracy i sacyjalnaj abarony, ale pakul nie pryniaty parłamientam. Ale zakon hety budzie pa-za kampietencyjaj Minabarony, bo alternatyŭnaja słužba pa vyznačeńni nie źjaŭlajecca vajskovaj.
Ad vojska pierastali chavacca — niekalki hadoŭ tamu kožny piaty pryzyŭnik uchilaŭsia ad hanarovaha abaviazku, u minuły pryzyŭ takich było 2 sa 100 čałaviek. Minabarony taksama nahadvaje studentam zamiežnym VNU pra nieabchodnaść paviedamić pra svajo navučańnie ŭ vajenkamat, kab nie patrapić u śpis nievyjaznych.
«Dziedaŭščynu» vyniščyli zahadam ministra abarony. Niekalki hadoŭ tamu Leanid Malcaŭ padpisaŭ zahad, jaki musiŭ vyrašyć pytańnie dyscypliny ŭ vojsku. Jon praduhledžvaŭ skasavańnie adkaznaści kamandziraŭ za złačynstvy padnačalenych. Dziakujučy hetamu kamandziry pačali pierastali ŭtojvać fakty złačynstvaŭ, ździejśnienych padnačalenymi, u tym liku i vypadki parušeńnia statutnych uzajemaadnosin pamiž vajskoŭcami. U vyniku, padkreśliŭ V. Ramienčyk, možna kazać pra vykaranieńnie takoj źjavy, jak dziedaŭščyna.
Statystyka samahubstvaŭ u vojsku adkrytaja. Ale ŭ vojsku kažuć nie pra suicyd, a pra «hibiel vajskoŭcaŭ u časie vykanańnia svaich abaviazkaŭ», skazaŭ načalnik pres-słužby Minabarony. U 2008 hodzie zahinuli dva čałavieki, hetulki ž u 2007-m.
Siarod pryzyŭnikoŭ amal niama asobaŭ ź nietradycyjnaj sieksualnaj aryjentacyjaj, ale iznoŭ taki, heta nie vyzvalaje ich ad prachodžańnia mierapryjemstvaŭ pryzyvu. Pryzyŭnik moža być vyzvaleny ad prachodžańnia vajskovaj słužby tolki ŭ vypadku, kali budzie pryznany niahodnym pavodle stanu zdaroŭja. I nie treba prykryvacca palityčnymi pohladami, ci sieksualnaj aryjentacyjaj, papiaredziŭ pałkoŭnik Murašoŭ.
Pradstaŭniki Minabarony zapeŭnivajuć, što biełaruskija sałdaty charčujucca nie horš za nataŭskich — u ich racyjon uvachodziać miasa, sadavina, harodnina, bahatyja nieabchodnymi vitaminami. A ŭ hetym hodzie budzie zładžany ekśpierymient, u časie jakoha našych vajskoŭcaŭ buduć karmić pavodle sistemy «šviedski stoł».
Z 15 pa 31 studzienia ŭ vojska nakirujecca kala 10 tysiač maładych ludziej. Usiaho ŭ zimovaj pryzyŭnoj kampanii voźmie ŭdzieł kala 86 tysiač pryzyŭnikoŭ. Uračystaja prysiaha va Ŭzbrojenych siłach adbudziecca 7 lutaha.
