Telehram-kanał Nexta paviedamiŭ 10 červienia, što ŭ Miensku znajšli paviešanym 45-hadovaha supracoŭnika kryminalnaha vyšuku Leninskaha RUUS Andreja M. Na prośbu prakamentavać hetuju infarmacyju ŭ Śledčym kamitecie karespandentu Svabody paviedamili, što 10 červienia, u padvalnym pamiaškańni šmatkvaternaha žyłoha doma znojdziena cieła mužčyny, 1974 hoda naradžeńnia.
Na miescy zdareńnia pabyvała śledča-aperatyŭnaja hrupa, «usie abstaviny zdareńnia vyśviatlajucca, pryznačana sudova-medycynskaja ekspertyza».
«Papiarednie ŭstanoŭlena, što śmierć mužčyny nia maje kryminalnaha charaktaru», — paviedamili ŭ Śledčym kamitecie.
Znajomy zahinułaha milicyjanta, pamočnik deputatki Hanny Kanapackaj Dzianis Cichanienka, jaki vučyŭsia razam z pamierłym u škole i rehularna kantaktavaŭ paśla, kaža, što sumniavajecca ŭ versii suicydu.
Cichanienka adznačaje, što samahubstvy — heta, biezumoŭna, «ciomnaja sprava», ale jon nia vieryć u toje, što hety čałaviek moh by ŭčynić takoje, i nie ŭjaŭlaje, što mahło b jaho padšturchnuć.
Maŭlaŭ, mužčyna «bačyŭ śmierć i viedaje, što heta takoje», i naŭrad ci jaho moh niechta napužać, bo jon usio žyćcio pracavaŭ ź niebiaśpiečnymi złačyncami.