Žałobnaja cyrymonija pačałasia ŭ 3.15 z teatralizavanaj pastanoŭki pra apošni mirny dzień 1941 hoda. U napamin ab tym, što zdaryłasia 78 hadoŭ tamu, pieradśvitalnuju cišyniu pierapynili kulamiotnyja streły i załpy artsnaradaŭ. Na ŭstanoŭlenych la Viečnaha ahniu ekranach źmianialisia partrety abaroncaŭ Bresckaj krepaści, hučali ŭspaminy pra pieršyja dni Vialikaj Ajčynnaj vajny. Za dziejańniem na płoščy Cyrymanijałaŭ nazirali kala 10 tysiač čałaviek.
«Dzień pamiaci i smutku viartaje nas da adnoj z samych harotnych dat u našaj historyi. Siońnia my ŭspaminajem tych, chto pieršym pryniaŭ boj, zahinuŭ na palach bitvaŭ, na akupavanych terytoryjach — usich, čyje žyćci abarvała vajna, — skazaŭ staršynia Bresckaha harvykankama Alaksandr Rahačuk. — Sioleta adznačajecca tysiačahodździe Bresta. Aceńvajučy minułyja stahodździ, my bačym, jak šmat adniała hetaja vajna. Naša asablivaja ŭdziačnaść frantavikam i pracaŭnikam tyłu za toje, što adstajali niezaležnaść Radzimy, znoŭku adbudavali spalenyja i spustošanyja harady, padaryli nam sučasnaść i budučyniu».
Sioleta da Bresckaj krepaści pryjechali žurnalisty i błohiery z Kazachstana, pradstaŭniki asacyjacyi voinaŭ-internacyjanalistaŭ Kalininhradskaj vobłaści, udzielniki ciahnika pamiaci z Sankt-Pieciarburha, delehacyi horada Siertołava Leninhradskaj vobłaści, Ižeŭska.
