Biełarus moh pajści ŭ turmu na termin da 4 hadoŭ, adnak jon zdoleŭ damovicca z prakuroram i atrymaŭ minimalnaje pakarańnie.
Uradženiec Homiela abvinavačvaŭsia ŭ niezakonnaj prasłuchoŭcy mabilnych telefonaŭ karystalnikaŭ pasłuh apieratara «Kijivstar». Śledstva pa spravie pravodziła Słužba biaśpieki Ukrainy, supracoŭniki jakoj u Adesie padčas pieratrusu ofisa ŭ domie № 55 pa vulicy Vialikaj Arnauckaj kanfiskavali vialikuju kolkaść aparatury.
Prymorski rajonny sud Adesy pryznaŭ biełarusa vinavatym u ździajśnieńni złačynstva pa č.1 art. 359 KK Ukrainy (niezakonnyja nabyćcio, zbyt abo vykarystańnie śpiecyjalnych techničnych srodkaŭ atrymańnia infarmacyi) i pakaraŭ jaho štrafam u pamiery 17 tysiač hryŭniaŭ (kala 650 dalaraŭ).
Miakkaść pakarańnia abumoŭlena asablivaściami ŭkrainskaha kryminalnaha zakanadaŭstva. Akazałasia, što jašče ŭ chodzie śledstva abvinavačvany całkam pryznaŭ vinu i raskajaŭsia ŭ złačynstvie. Dziakujučy hetamu jon zaklučyŭ z prakuroram dasudovaje pahadnieńnie, u jakim baki abhavaryli i mieru pakarańnia. Pry takich umovach rola suda zvodziłasia da zaćviardžeńnia prysudam hetaha pahadnieńnia. Što i adbyłosia.
Karespandent «Silnych novostiej» aznajomiŭsia z tekstam vierdyktu, ale nie znajšoŭ u im adkazu na hałoŭnaje pytańnie: ź jakoj metaj uradženiec Homiela prasłuchoŭvaŭ mabilnyja telefony adesitaŭ?
