U aŭtorak 9 lipienia prajšło raźvitańnie z achviarami aŭtamabilnaj avaryi, u jakoj zahinuli piaciora, u tym liku troje dziaciej. Na vulicy Biełaaziorsku vyjšli tysiačy čałaviek, piša Radyjo Svaboda.
Avaryja zdaryłasia ŭ niadzielu 7 lipienia. Biezdarožnik «Mersedes», jakim kiravaŭ niećviarozy 31-hadovy miascovy žychar, źlacieŭ z darohi na zakruhleńni i ŭpaŭ u kanał. U mašynie było 10 čałaviek.
Raźvitańnie z achviarami avaryi prajšło ŭ biełaaziorskaj carkvie ŭdzień 9 lipienia. Trapić na adpiavańnie zmahli nia ŭsie — da carkvy pryjšli niekalki tysiač čałaviek. Nia ŭsie jany zmahli źmiaścicca navat na dziadzincy, ludzi stajali paabapał vulicaŭ i za carkoŭnaj aharodžaj.
«Dvoje chłopcaŭ sieli ŭ bahažnik — i my pajechali». Acaleły ŭ strašnaj avaryi pad Biełaazierskam raspavioŭ padrabiaznaści
Truny ź ciełami zahinułych vieźli pa vulicach Biełaaziorsku. Siabry 21-hadovaha Paŭła, jaki nia zmoh vybracca z bahažnika zatanułaha aŭtamabila, nieśli trunu ź jahonym ciełam na rukach.
«Zusim małady chłopiec, 21 hod usiaho, — raskazała Svabodzie znajomaja siamji zahinułaha. — Jon tolki z vojska viarnuŭsia, jašče, zdajecca, navat i na pracu nie ŭładkavaŭsia. Narmalny chłopiec, jak usie. Nijaki nia pjanica. Kab nia hety bahažnik… Jon by vybraŭsia z mašyny, kab nie ŭ bahažniku jechaŭ. A tak… Kudy tam było».
Cieła Iryny Biarnackaj i jaje dački Maryi da carkvy pryvieźli z žałobnaj pracesijaj ad škoły №3, dzie vučyłasia dziaŭčynka. Napiaredadni tam ža adbyvałasia raźvitańnie. U žałobnaj cyrymonii ŭdzielničali vučni škoły i nastaŭniki.
«Dziaciej škada, zusim maleńkija dzieci, — havoryć susiedka Kaciaryny, jakaja ŭ avaryi straciła dvaich dziaciej. — My ŭ adnym domie žyviom na Lenina, ja znaju jaje, i dziaciej znała. Vialikaja biada, uvieś horad viedaje, pahladzicie, kolki tut ludziej. Tak dziaciej škada. Darosłyja viedajuć, što robiać, a dzieci tut pry čym».
Padčas cyrymonii raźvitańnia ruch na niekalkich vulicach pobač z carkvoj byŭ spynieny. Jak havorać žychary Biełaaziorsku, trahiedyja mocna zakranuła amal kožnaha žychara 12-tysiačnaha horadu. Mnohija byli znajomyja ź siemjami achviaraŭ i tych, kamu ŭdałosia vyratavacca.
