Da 2050 hoda klimat u Minsku budzie nahadvać siońniašniuju Safiju: siaredniehadavaja tempieratura vyraście na 2,8 hradusa, a samy ciopły miesiac u hodzie stanie na 5,7 hradusa ciaplejšy.
Pra heta śviedčać vyniki daśledavańnia, praviedzienaha daśledčym centram Crowther Lab z Technałahičnaha ŭniviersiteta Ciurycha.
Typovaje nadvorje ŭ Łondanie budzie padobnaje na sučasnuju Barsiełonu, Stakholm — na Budapiešt, Ryha — na Vienu, Vilnia — na Pryšcinu, a Kijeŭ naohuł na stalicu Aŭstralii Kanbieru.
Siońnia, naprykład, u Safii da +25, a pad kaniec nastupnaha tydnia budzie da +29.
U cełym bolšaść z 520 uklučanych u daśledavańnie haradoŭ z punktu hledžańnia klimatu «zrušacca» prykładna na 1000 km u bok ekvatara. U mnohich haradach heta zapatrabuje rezkich źmianieńniaŭ u infrastruktury (naprykład, z zabieśpiačeńniem pitnoj vadoj) i moža niehatyŭna paŭpłyvać na zdaroŭje nasielnictva. Asabliva dramatyčnyja źmieny mohuć čakać harady ŭ Centralnaj Jeŭropie — u pryvatnaści, Vienu i Lublanu — tam samy ciopły miesiac u hodzie paciapleje jašče na na 7-8 hradusaŭ.
Pabudavanyja na asnovie ciapierašnich dadzienych (z ulikam apadkaŭ i siezonnaści) madeli pradkazvajuć, što siaredniaja tempieratura ŭ śviecie moža vyraści na 2,4 hradusa, a Jeŭropa stanie ciaplejšaj na 2,5 hradusaŭ. Zimy ŭ Jeŭropie buduć ciaplejšyja na 4,7 hradusa.
