Alaksandru Sakałoviču było 36 hadoŭ. Jon z hod tamu ŭładkavaŭsia kiroŭcam u kampaniju Girteka Logistics, jeździŭ u mižnarodnyja rejsy.
Pierad svaim apošnim rejsam skardziŭsia zvodnamu bratu, što nie choča jechać u hetu pajezdku.
«Chaču doma z Karynkaj i Miłankaj pabyć», — kazaŭ jon napiaredadni. Karyna i Miłana — heta jaho dočki, starejšaj było šeść hadoŭ, małodšaj čatyry», — raskazvaje Dzianis Ivanoŭ.
Ab tym, što zdaryłasia ŭ Hiermanii, siamji paviedamili na nastupny dzień. Patelefanavali pradstaŭniki firmy, dzie pracavaŭ Alaksandr.
A paśla pračytali pra zdareńnie ŭ internecie. Na sajcie NDR.de raspaviadajecca pra toje, što avaryja adbyłasia 23 lipienia ŭ 7:20 na trasie A7, kala pavarotu da vioski Dryśpienštedt, što niedaloka ad horada Childeschajma ŭ Hiermanii.
Na ŭzbočynie darohi stajała fura, kiroŭca jakoj mianiaŭ prabitaje koła. Dva aficery palicyi vystavili patrulnyja aŭtamabili ŭ pieršaj pałasie trasy i aharadzili heta miesca majačkami.
U tym ža kirunku pa darozie jechaŭ hruzavik, kiroŭca jakoha nie zaŭvažyŭ niebiaśpiečnaje miesca i ŭrezaŭsia ŭ patrulnuju mašynu, jakaja ad udaru zajechała ŭ pryparkavanuju furu. Pamiž aŭtamabilem palicyi dy hruzavikom i znachodziŭsia kiroŭca. Jaho zacisnuła pamiž dźviuch mašyn.
Mužčynu dastavili ŭ balnicu, ale ad atrymanych traŭmaŭ jon pamior.
«Žoncy Alaksandra paviedamili, što pamior jon kala piaci hadzin viečara. Dastaŭkaj cieła zajmajecca firma, u jakoj pracavaŭ Saša. Kali jaho pryviazuć u Biełaruś, my nie viedajem. Učora pryjazdžaŭ pradstaŭnik firmy, maci padpisała davieranaść na atrymańnie cieła. Jon skazaŭ, što Sašu pryviazuć nie raniej, čym praz tydzień. Biedny naš Saša, jakaja niedarečnaja śmierć…» — kaža Dzianis Ivanoŭ.
