Partyja BNF u šosty raz abvieściła łaŭreata pamiatnaha znaka imia Viktara Ivaškieviča, paviedamlaje pres-słužba BNF. Partyja adznačaje im arhanizataraŭ najbolš značnych masavych akcyj. Sioleta, 27 lipienia, pamiatny znak uručany lidaru haradzienskaj arhanizacyi BNF, namieśniku staršyni BNF Vadzimu Sarančukovu.
Takim čynam byŭ adznačany arhanizacyjny ŭniosak Vadzima Sarančukova ŭ #BNR101 — śviata na Dzień Voli ŭ Harodni z nahody 101-j hadaviny abviaščeńnia Treciaj ustaŭnoj hramaty Biełaruskaj Narodnaj Respubliki.
Mienavita ŭ Harodni sto hadoŭ tamu mieściŭsia ŭrad BNR, i mienavita tut u hetym hodzie była sfarmavanaja šyrokaja kaalicyja demakratyčnych supołak, zdolnaja zładzić vialikaje śviata biełaruskaj niezaležnaści na hodnym uzroŭni. Śviatkavańnie sioletniaha Dnia Voli 23 sakavika u Kałožskim parku sabrała bolš za 5000 udzielnikaŭ.
Vadzim Sarančukoŭ, prymajučy pamiatny znak, adznačyŭ, što mitynh ŭ druhoj stalicy BNR staŭ vynikam pracy šyrokaj kamandy haradzienskich aktyvistaŭ z roznych demakratyčnych arhanizacyj u supracy ź mienskaj kamandaj, abjadnanaj pad chešteham #BNR101.
Prymajučy pamiatny znak imia Viktara Ivaškieviča, Vadzim Sarančukoŭ skazaŭ: «Ja viedaŭ Viktara Ivaškieviča asabista i dla mianie vialiki honar ad imia haradzienskaj kamandy atrymać hetuju ŭznaharodu. Viktar vieryŭ u Baćkaŭščynu, my vierym taksama i kožny dzień pacichu jaje nabližajem. Žyvie Biełaruś!»
Z nahody ŭručeńnia tradycyjnaha pamiatnaha znaku, staršynia BNF Ryhor Kastusioŭ zajaviŭ: «Ja rady, što hetaja akcyja abjadnała i haradziencaŭ, i mienčukoŭ, złučyła pradstaŭnikoŭ roznych palityčnych partyj i hramadzkich ruchaŭ. Mnie asabliva pryjemna, što «matoram» hetaha ruchu staŭ naš, frontaŭski čałaviek, staršynia haradzienskaj arhanizacyi BNF, namieśnik staršyni Partyi BNF Vadzim Sarančukoŭ».
Pamiatny znak imia Viktara Ivaškieviča byŭ zasnavany Partyjaj BNF u pamiać pra palityka, arhanizatara šmatlikich demanstracyjaŭ dy šeściaŭ, jaki pajšoŭ z žyćcia ŭ 2013 hodzie. Sioleta ŭznaharoda była ŭručanaja ŭ šosty raz. Abviaščeńnie łaŭreata pamiatnaha znaku tradycyjna prymierkavanaje da 27 lipienia — dnia abviaščeńnia dekłaracyi pra dziaržaŭny suvierenitet Biełarusi.
U raniejšyja hady znak imia Viktara Ivaškieviča ŭručaŭsia lidaru hramadzkaj arhanizacyi «Alternatyva» Alehu Korbanu, kinarežysiorcy i hramadzkaj aktyvistcy Volzie Mikałajčyk, lidaru «Maładoha Fronta» Źmitru Daškieviču, vieteranu nacyjanalna-adradženskaha ruchu Ninie Bahinskaj, ŭładalniku kramy symbal.by Paŭłu Biełavusu.
