U adnoj z ałkaholnych kram Kijeva pradaviec-biełarus admoviŭsia absłuhoŭvać pakupnikoŭ na ŭkrainskaj movie. Jon zajaviŭ, što nie viedaje pra isnavańnie novaha zakona ab ŭkrainskaj movie, a taksama prykryŭsia dazvołam dyrektara kamunikavać pa-rusku. Pra hety incydent napisała na svajoj staroncy ŭ Facebook ukrainskaja piśmieńnica, zmaharka za ŭkrainskuju movu Łarysa Nicoj. Pavodle jaje słoŭ, kanflikt adbyŭsia ŭ kramie handlovaj sietki Beer Market.
«Piŭnaja krama Beer Market. Žnivień 2019 hoda. Amal miesiac, jak ustupiŭ u dziejańnie zakon ab movie 5670-d [Zakon ab zabieśpiačeńni funkcyjanavańnia ŭkrainskaj movy jak dziaržaŭnaj — zaŭv.Red.]. Vypadak pieršy. Pakupnik:
— Čamu vy mianie absłuhoŭvajecie na ruskaj? Ja nie ruski, ja ŭkrainiec.
Pradaviec:
— Tamu što ja biełarus.
— Vy pryjechali va Ukrainu mianie absłuhoŭvać, — kaža pakupnik, — a nie ja vas. Absłuhoŭvajcie mianie na majoj movie.
— Ja ničoha nie parušaju.
— Dy nie, parušajecie. Ustupiŭ u dziejańnie zakon ab movie.
— Nie viedaju takoha zakona, — kaža pradaviec, uśmichajučysia. — Mahu vam pracytavać Kanstytucyju, tam napisana inšaje.
— Davajcie, cytujcie, — kaža pakupnik. — Pačniecie z 10 artykuła abo 53?
Pradaviec łupić vočy. Na hetym dyskusija spyniajecca. Usie razychodziacca», — cytuje dyjałoh Nicoj.
Jana adznačyła, što praź niekalki dzion u hetaj ža kramie situacyja paŭtaryłasia z užo novymi klijentami. Pradaviec znoŭ admoviŭ im u kamunikacyi pa-ŭkrainsku.
«Maładaja para:
— Čamu vy nas absłuhoŭvajecie na ruskaj?
— Ja biełarus.
— Vy kolki hadoŭ žyviacie va Ukrainie?
— Dva.
— Vy ŭžo daŭno mahli vyvučyć movu, ničoha nie viedajem, absłuhoŭvajcie nas pa-ŭkrainsku. Vy što, nie viedajecie, što ŭ nas jość zakon?
— Adčapiciesia sa svaim zakonam, mnie haspadar kramy dazvoliŭ absłuhoŭvać klijentaŭ na ruskaj», — pracytavała znoŭ pradaŭca piśmieńnica.
Nicoj adznačyła, što navat kali pakupniki vyklikali b palicyju, parušalniku zakona ničoha b nie było. Pakolki padčas pierachodnaha pieryjadu paśla ŭstupleńnia zakona ŭ siłu štrafy zabaronienyja.