Čytač «Našaj Nivy» paviedamiŭ pra niezvyčajnuju situacyju z samalotam Biełavii ŭ Amsterdamie, jakoj staŭ śviedkam.
Hetuju historyju jon aceńvaje jak hieraičnuju.
Z hetym samalotam usio zdaryłasia. Fota Belavia.by
«U čaćvier, 22 žniŭnia, lacieli ź siamjoj ź Minska ŭ Amsterdam. Ja tak razumieju, tamtejšy aeraport byŭ mocna pierahružany: pieršy raz takoje bačyŭ prosta ŭ iluminatar, kab pobač na pasadku zachodzili samaloty, tak blizka. My ŭžo siadali, kranulisia kołami pałasy i pajechali, ale znoŭ nabrali chutkaść i ŭźlacieli, sieli z druhoha razu.
Jak patłumačyła kamanda, kali ja pravilna zrazumieŭ, niechta z tych, chto siadaŭ pierad nami, nie paśpiavaŭ ci to źjechać, ci to raźviarnucca, i była ryzyka ŭrezacca, tamu my pajšli na druhoje koła.
Usie paśla pryziamleńnia chacieli pacisnuć ruku piłotu, ja taksama padziačyŭ», — raskazaŭ čytač Našaj Nivy Alaksiej.
Źviestki FlightRadar'a paćviardžajuć hety raskaz — bačna, što biełaruski samalot užo pačaŭ tarmazić, ale paśla karotkaha tarmažeńnia znoŭ pajšoŭ uvierch.
My spytalisia ŭ «Biełavija», a što tam takoje było. Tyja paćvierdzili, što samalotu daviałosia ŭźlacieć praz toje, što na pałasie byŭ inšy.
«Pasadka rejsa B2 867 Minsk-Amsterdam prachodziła ŭ štatnym režymie pad poŭnym kantrolem dyśpietčaraŭ aeraporta Schipchoł, — havorycca ŭ kamientary «Biełavija». — Adnak pry pasadcy piłotam była dadziena kamanda syści na druhi kruh z-za niavyzvaleńnia pałasy inšym pavietranym sudnam. Ekipaž dziejničaŭ u adpaviednaści ź instrukcyjaj dyśpietčaraŭ, palot prachodziŭ u štatnym režymie i ŭ adpaviednaści z praviłami biaśpieki palotu. Biaśpieka pasažyraŭ, ekipaža i pavietranaha sudna była zabiaśpiečana całkam. Infarmacyja pra pryčyny sychodu na druhi kruh była daviedziena kamandziram pavietranaha sudna pasažyram pa hučnaj suviazi».
