U aŭtorak parłamient Brytanii viarnuŭsia z vakacyj — i ŭ brytanskaj palitycy razharnułasia bitva, jakoj jašče nie było ŭ najnoŭšaj historyi krainy, piša bbc.com.
Parłamient zrabiŭ pieršy važny krok da taho, kab zabaranić premjeru «žorstki breksit».
Pozna ŭviečary ŭ aŭtorak Pałata abščyn bolšaściu hałasoŭ — 328 suprać 301 — pastanaviła adabrać va ŭrada prava vyznačać paradak parłamienta.
Heta adkryvaje šlach dla pryniaćcia zakona, jaki vyklučaje rezki razryŭ suviaziaŭ ź ES. Razhladać jaho parłamientaryi buduć u sieradu.
Borys Džonsan adrazu paśla hałasavańnia zajaviŭ, što, kali deputaty prahałasujuć za adterminoŭku, jon uniasie prapanovu ab pazačarhovych vybarach.
U historyi Brytanii było šmat palityčnych kryzisaŭ, ale jašče nie byvała tak, kab syšłosia stolki ŭsiaho adrazu: kraina pavinna, ale nie moža pryniać losavyznačalnaje rašeńnie; parłamient źbirajecca adabrać va ŭrada prava na hetaje rašeńnie i dla hetaha hatovy zasiadać choć načami, choć u vychodnyja.
Premjer-ministr pry hetym faktyčna nie maje bolšaści ŭ parłamiencie, kirujučaja partyja raskołataja na vajujučyja frakcyi, try sudy razhladajuć pazovy ab zakonnaści prypynieńnia pracy parłamienta, i ŭ dadatak na zadnim płanie majačyć pierśpiektyva refierendumu ab niezaležnaści Šatłandyi i novych sutyknieńniaŭ u Paŭnočnaj Irłandyi.
Vychad Brytanii ź Jeŭrapiejskaha sajuza pryznačany na 31 kastryčnika.
Kali u hetaj bitvie pieramoža parłamienckaja bolšaść — «breksit», chutčej za ŭsio, budzie adkładzieny i Brytanija praviadzie pazačarhovyja vybary i, nie vyklučana, novy refierendum ab členstvie ŭ Jeŭrasajuzie.
Kali pieramoža Borys Džonsan — chutčej za ŭsio, Brytanija 31 kastryčnika «vypadzie» ź Jeŭrasajuza.
