Pres-sakratarka Łukašenki prakamientavała dla DW pachodžańnie jaho aŭtamabila Tesla. Raniej Iłan Mask abvierh słovy kiraŭnika dziaržavy pra padorany jamu elektramabil.
Natalla Ejsmant u kamientary karespandentu DW paćvierdziła ŭ aŭtorak, 10 vieraśnia, što ŭ aŭtaparku Alaksandra Łukašenki jość Tesla. Na pytańnie, adkul hetaja mašyna źjaviłasia, Natalla Ejsmant adkazała, što Tesla Łukašenki «z zavoda». Dać infarmacyju pra toje, chto i z kim katajecca na elektramabili, pres-sakratarka nie zmahła: «Viedaju dakładna, što pieryjadyčna Alaksandr Ryhoravič daśleduje jaje na chutkaść. A adnojčy navat razabraŭ častkova, kab pahladzieć, jak jana pracuje; jak batareja da dna macujecca, nu i hetak dalej». Sama Natalla Ejsmant na Tesla nie jeździła.
Pachodžańnie elektrakara Tesla zacikaviła hramadskaść Biełarusi paśla taho, jak zasnavalnik amierykanskaj kaśmičnaj kampanii SpaceX Iłan Mask abvierh słovy Alaksandra Łukašenki pra toje, što jon nibyta padaravaŭ biełaruskamu lidaru elektramabil Tesla. Na pytańnie karystalnika Twitter, ci sapraŭdy jon zrabiŭ Łukašenku taki padarunak, Mask adkazaŭ: «O nie».
Pres-sakratarka paćvierdziła, što Łukašenka mieŭ na ŭvazie tuju ž samuju mašynu, jakuju jon upieršyniu pratestavaŭ na svoj dzień naradžeńnia ŭ 2017 hodzie — Tesla madeli S P100D. Adrazu paśla testu Łukašenka paviedamiŭ žurnalistam, što razahnaŭsia na joj da 280 km/h (choć maksimalnaja chutkaść aŭtamabila 250 km/h).
Tady «Kamsamolskaja praŭda» pisała, što, pa čutkach, elektramabil dla testu pieradaŭ uładalnik ź Viciebska, ale paćviardžeńniaŭ hetamu niama. Taksama vykazvalisia zdahadki, što mašynu Łukašenku padaryŭ rasijski biznesmien Michaił Huceryjeŭ — u dzień testavańnia elektrakara ŭ 2017 hodzie ŭ Łukašenki z Huceryjevym prajšła aficyjnaja sustreča.
Adnak Natalla Ejsmant hetuju infarmacyju rašuča abviarhaje: «U Michaiła Safarbiekaviča sapraŭdy było žadańnie padaryć prezidentu takuju mašynu, jon viedaŭ, nakolki dobra Alaksandr Ryhoravič stavicca da elektramabila i jak mocna jaho žadańnie raźvivać padobny transpart u Biełarusi. Ale prezident admoviŭsia, tamu što takaja mašyna ŭ jaho ŭžo była — taja samaja, jakuju jon vypraboŭvaŭ».
Pa słovach Ejsmant, Łukašenka vydatna stavicca da elektratranspartu i maryć, kab u Biełarusi byŭ raspracavany ułasny elektramabil. Bolš infarmacyi na hetuju temu atrymać nie ŭdałosia.
