U Homieli zarehistravanyja dźvie inicyjatyŭnyja hrupy kandydataŭ, jakija pradstaŭlajuć prajekt «Varta». Jany ŭžo zaviali svoj telehram-kanał, a taksama čat dla abmierkavańnia. Nasamreč pad «Vartu» maskirujucca tak zvanyja «žyvyja čałavieki», jakija teraryzujuć čynoŭnikaŭ i admaŭlajucca ad aficyjnych dakumientaŭ.
Sprava «žyvy čałaviek» Alaksiej Jelisiejeŭ, u centry — kandydatka Alena Davydava.
«My stvaryli prahramu, jakaja zdolnaja zrabić ludziej svabodnymi, niezaležnymi i bahatymi», — havorycca ŭ pieradvybarčym roliku pradstaŭnikoŭ «Varty».
Što jany abiacajuć? Najpierš źmieny ŭ padatkavy i mytny kodeksy (nie treba budzie płacić amal nijakija padatki), admovu ad manapolii dziaržavy ŭ sistemie adukacyi, pierachod u sielskaj haspadarcy da fiermierstva i h.d. Na kožny punkt jany cytujuć niejkuju tajamničuju «Biełuju knihu Varta». Naprykład, jany prapanujuć hladzieć na padatki jak na kradziež, a na dziaržavu, jakaja źbiraje padatki, — jak na bandu złodziejaŭ.
Pradstaŭniki prajekta ličać, što ŭ dziaržavy nie treba prasić dazvoł na toje, kab budavać damy, brać šlub, kiravać aŭtamabilem, mieć zbroju, źbiracca na mitynhi i h.d. Hetyja pravy ŭ ludziej, ci dakładniej «čałaviekaŭ», jość ad naradžeńnia.
U vyniku «Varta» vyłučyła dvaich kandydataŭ. Pa 33-j Homielskaj-Centralnaj vybarčaj idzie pradprymalnik Jaŭhien Bałdujeŭ, a pa 36-j Homielskaj-Navabielickaj urač-bakteryjołah Alena Davydava. Mabyć, heta tyja, u kaho ŭsio ž jość pašparty hramadzian Biełarusi. Źviartaje ŭvahu, chto źjaŭlajecca kiraŭnikom inicyjatyŭnaj hrupy Bałdujeva — heta 38-hadovy Alaksiej Jelisiejeŭ.
Čym cikavy hety čałaviek? Jon źjaŭlajecca pradprymalnikam. U jaho šaściora dziaciej, jakich zavuć Vasilisa, Radamir, Dabrasłaŭ, Łučazar, Jaramir i Śvietazar. Pra siabie jon zajaŭlaje, što ŭžo dva hady nie płacić padatki i FSZN, a taksama admoviŭsia ad usich dakumientaŭ. Jelisiejeŭ nie maje ani pašpartu, ani pravoŭ kiroŭcy. Pašpart hramadzianina Biełarusi, naprykład, jon nazyvaje «aŭsvajsam».
Jelisiejeŭ adnosić siabie da tak zvanych «žyvych čałaviekaŭ». Heta taki ruch, pradstaŭniki jakoha śviadoma admaŭlajecca ad hramadzianstva Biełarusi, jany sami sabie malujuć paśviedčańni, pa jakich i žyvuć. Jany ličać, što paśla atrymańnia dakumientaŭ, jakija paćviardžajuć tvaju fizičnuju asobu, čałaviek stanovicca «miortvym», i «žyvym» jon moža stać tolki paśla taho, jak abvieścić siabie takim.
Jany ličać, što SSSR nie raspaŭsia da hetaj pary, ličučy siabie «hramadzianami BSSR». Jašče Jelisiejeŭ pościć bahata infarmacyi na svajoj staroncy pra «płoskuju» Ziamlu. A jašče «žyvyja čałavieki» nie pryznajuć lehitymnaść siońniašniaj ułady. Ličać, što ŭsie ŭłaśniki pašpartoŭ źjaŭlajucca «rabami».
«Naša meta — źmianić palicejski dyktatarski ład, jaki isnuje ciapier», — piša Jelisiejeŭ u čacie «Varty».
Jelisiejeŭ nie vyklučaje, što svajho kandydata jany mohuć vyłučyć i na nastupnyja prezidenckija vybary.
Hladzi taksama: Adepty SSSR teraryzujuć čynoŭnikaŭ: daviali deputata da isteryki, na ŭpaŭnavažanaha pa spravach relihij vyklikali AMAP. Chto jany?
