Na rasijskim sajcie «Pravasłaŭny śviet» źjaviŭsia adkryty list u abaronu aryštavanych pa tak zvanaj «maskoŭskaj spravie». Pikantnaść dadaje toj fakt, što da pierahladu spravaŭ zaklikali pravasłaŭnyja śviatary. Hieahrafična jany znachodziacca ad Dublina da Hankonha. Siarod padpisantaŭ i šaściora śviataroŭ-biełarusaŭ.
Kanstancin Kotaŭ asudžany da 4 hadoŭ kałonii.
Siarod asudžanych — udzielnik maskoŭskaj akcyi pratestu Kanstancin Kotaŭ. Jaho zatrymali prosta pry vychadzie ź mietro, jon nie vykrykvaŭ łozunhi, nie trymaŭ u rukach nijakich płakataŭ. Kotava abvinavacili ŭ nieadnarazovym parušeńni praviadzieńnia masavych akcyj i asudzili na čatyry hady kałonii.
Siarod rečavych dokazaŭ u Kotava znajšli płakat z cytataj prataireja Alaksandra Mienia «Miłasernaść — heta toje, da čaho my zaklikajem» i zaklik da abmienu pałonnymi z Ukrainaj.
«My spadziajomsia, što ź inšych fihurantaŭ spravy, jakija čakajuć suda i nie abvinavačvajucca ŭ hvałtoŭnych dziejańniach (u pryvatnaści z Alaksieja Miniajły, pravasłaŭnaha čałavieka, aktyŭna ŭłučanaha u hramadskuju i dabračynnuju pracu), buduć źniatyja abvinavačvańni, i jany buduć na svabodzie ŭ bližejšy čas», — havorycca ŭ liście.
Adznačym, što siarod padpisantaŭ znajšłosia i šaściora śviataroŭ ź Biełarusi (chutčej za ŭsio, hety śpis budzie pašyrany). U pryvatnaści padpisaŭsia kiraŭnik adździeła pa pracy z moładździu Mahiloŭskaj jeparchii BPC Viktar Nikišoŭ. U kamientary «NN» śviatar patłumačyŭ svaju pazicyju:
Viktar Nikišoŭ na piarednim fonie. Fota z vk.com.
«Prysud vyhladaje vielmi žorstkim za takoje dziejańnie. Chaciełasia b, kab sud pierahledzieŭ hety vyrak, bo časta zdarajecca, što za bolš ciažkoje złačynstva prysudžajuć mienš surovaje pakarańnie. Tym bolš što ŭ rukach Kotava byŭ płakat ab miłasernaści. My ŭsie pavinny zadumacca ab miłasernaści ŭ dadzienaj situacyi. I zadača carkvy — nahadać pra hetuju miłasernaść. Ja — kiraŭnik adździełu pa pracy z moładździu, i liču, što taki surovy prysud moža kančatkova złamać chłopcu žyćcio. Mnie zdajecca, što tut možna było b abmiežavacca niejkimi prafiłaktyčnymi hutarkami, ale sadžać na taki vialiki termin — heta zanadta», — adznačyŭ ajciec Viktar.
Ci nie strašna jamu było padpisvacca pad hetym listom? «Krychu strašnavata, ale ja nie moh zastavacca ŭbaku. Ja sam naradziŭsia ŭ Rasii, vyras užo ŭ Biełarusi. Kali ŭ Minsku budzie niejkaja padobnaja situacyja, to, upeŭnieny, vystupiać i rasijskija śviatary. Tym bolš što ŭ nas kryminalnyja kodeksy vielmi padobnyja», — zaznačyŭ śviatar.
Siarod inšych padpisantaŭ homielski śviatar, manach Sava Mažuka. Na svajoj staroncy ŭ fejsbuku jon napisaŭ: «Ja ni kropli nie dysident, navat nie viedaju, chto heta takija. Ja prosty biełaruski śviatar, a śviataru nakanavana zastupacca za pakryŭdžanych, «u sardečnaj prastacie hutaryć pra Boha i praŭdu caram z uśmieškaj havaryć». Tamu całkam naturalna, kali ty bačyš niespraviadlivaść ci navat namiok na jaje, treba kazać, i kropka. Praca ŭ nas takaja».
«Kali ja pahadziŭsia padpisać list, mianie taksama spytali, a nie bajusia ja? A Baćka nie ŭłupić? A chiba my robim niešta drennaje? — adkazaŭ ja», — piša Mažuka.
Śviatar Alaksandr Kałacki z ahraharadka Kopcieŭka Hrodzienskaha rajona tak patłumačyŭ «NN», čamu jon siarod tych, chto padpisaŭ list: «Prosta ja całkam zhodny z usim, što tam napisana».
Siarod inšych biełarusaŭ, chto pastaviŭ svaje podpisy pad listom u abaronu rasijskich apazicyjanieraŭ: Alaksandr Kuchta, viadomy pa błohu «Baciuška adkaža», dyjakan Dźmitryj Paŭlukievič z Hrodna, a taksama ajciec Hieorhij Martyšeŭski z Rahačova.
