U rasparadžeńnie «Našaj Nivy» trapiŭ dakumient-prezientacyja z vynikami analizu dypłomnych rabot vypusknikoŭ fakulteta žurnalistyki BDU za niekalki hadoŭ.
Nakolki viadoma, jahony aŭtar — namieśnik dekana Uładzimir Ściapanaŭ. Jon znachodzicca na pasadzie ŭsiaho hod, raniej byŭ daradcam-kansultantam adnaho z upraŭleńniaŭ rasfarmavanaha IAC.
Uładzimir Ściapanaŭ. Fota Kyky.org
Dyk pra što havorycca ŭ jahonych vysnovach?
Jany krasamoŭna aformleny karcinkami, u jakich pryvodzicca kankretnaja absurdnaja fraza i nasuprać — vynikovaja stanoŭčaja adznaka ci vysokaja acenka navukovaha kiraŭnika.
Tak, naprykład, aŭtar adnaho z dypłomaŭ pryjšoŭ da niečakanaj navukovaj vysnovy, što Minsk — stalica Biełarusi, i atrymaŭ u vyniku 8 bałaŭ.
Pieršaje śćvierdžańnie nakont prymusovaj padpiski padajecca praŭdzivym i trapiła ŭ prezientacyju niezasłužana.
Pry 63% płahijatu ŭ rabocie navukovy kiraŭnik piša rezalucyju ab «vysokim pracencie aryhinalnaści tekstu».
Sam Ściapanaŭ kamientavać svaju rabotu «Našaj Nivie» nie staŭ, spasłaŭšysia na zaviedzieny paradak raboty z presaj praz načalstva.
Dekan fakulteta žurnalistyki Volha Samusievič tłumačyć, što siensacyi z hetaha dakumienta rabić nie varta, bo «takaja rabota pravodziłasia zaŭsiody».
Volha Samusievič. Fota Tomin.by
Pavodle jaje słovaŭ, sistema antypłahijat časam moža aceńvać papiarednija navukovyja publikacyi studentaŭ u ich ža dypłomach jak płahijat, tamu i ličby ŭ kožnaj rabocie treba aceńvać asobna.
Jana zapeŭnivaje, što ŭsia nieabchodnaja rabota pa kantroli i pavyšeńni jakaści dypłomaŭ viadziecca i nie spyniajecca.
Volha Samusievič u kiraŭnictvie žurfaka z 2008 hoda, kali stała namieśnicaj dekana. Dekan — ź leta minułaha hoda.
Prafiesijnaja žurnalisckaja supolnaść časta źviartaje ŭvahu na toje, što adbyvajecca na fakultecie.
