Jak stała viadoma kommersant.ru, u Maskvie dla ekstradycyi ŭ Biełaruś była aryštavanaja Viktoryja Aviarjanava, hiendyrektar ZAT «Intek», jakaja vałodaje papularnymi kłubami ŭ Minsku.
Śledčy kamitet Biełarusi abvinavačvaje žančynu va ŭchileńni ad vypłaty padatkaŭ. Hetaje złačynstva nie źjaŭlajecca aryštnym u Rasii. Skandalnaści situacyi dadaje toj fakt, što letam sud užo adchilaŭ patrabavańnie ab uziaćci pradprymalnicy pad vartu.
Chadajnictva prakurora ab aryšcie Viktoryi Aviarjanavaj Ćviarski rajsud Maskvy razhladaŭ try dni. Kali advakat paviedamiŭ sudździ, što ŭ červieni sud užo adchilaŭ adpaviednuju prośbu, prakuratury byŭ dadzieny čas na zbor dadatkovych dokazaŭ. Bo zhodna z kryminalna-pracesualnym kodeksam nielha dvojčy abirać mieru strymańnia pa adnych i tych ža padstavach. Słuchańni byli adkładzienyja, i choć ničoha novaha, pa dadzienych abarony, u spravie nie źjaviłasia, dziažurny sudździa adpraviŭ žančynu na dva miesiacy ŭ SIZA.
Viktoryja Aviarjanava źjaŭlajecca hiendyrektaram dźviuch kampanij — «Bistrof», jakaja zajmajecca handlem, i «Intek», jakaja kiruje niekalkimi siamiejnymi restaranami i kłubami. Pavodle siamiejnaj lehiendy, jaje baćka, Juryj Aviarjanaŭ, zarabiŭ na ich, handlujučy adzieńniem na rynkach, u tym liku na minskim stadyjonie «Dynama». U 2017 hodzie Śledčy kamitet Biełarusi pa materyjałach pravierki, praviedzienaj śpiecsłužbami, pačaŭ kryminalnuju spravu pa č. 2 art. 243 KK (uchileńnie ad spłaty padatkaŭ u asabliva bujnym pamiery). Pa viersii śledstva, uchileńnie ad padatkaŭ na ahulnuju sumu 890 tys. biełaruskich rubloŭ dapuścili minskija kłuby «Miedysan», «Afrykana» i «Tabu», kiravanyja «Intekam».
Złačynstva było ździejśniena, pa viersii śledstva, u pieryjad z 2010 pa 2015 hod. Adnak, jak adznačyŭ advakat, u zapytach ab vydačy Aviarjanavaj nie ŭdakładniajecca, pra jakija rubli idzie havorka.
Uličvajučy, što mierkavanaje złačynstva było ździejśniena da denaminacyi 2016-ha, uchileńnie mahło być na sumu mienš za 1 młn rasijskich rubloŭ, a heta naohuł nie padpadaje pad kryminalnuju adkaznaść u RF. Tym bolš u adpaviednaści z KPK za padatkovyja złačynstva ŭ Rasiei nielha aryštoŭvać.
Pa viersii abarony, Aviarjanava nie chavalisia ŭ Rasii ad śledstva, a prosta siudy pierajechała razam ź siamjoj na całkam zakonnych padstavach kala dvuch hadoŭ tamu i vychoŭvaje dvuch dziaciej, samy małodšy ź jakich naradziŭsia jakraz u razhar rasśledavańnia. Paśla paŭtornaha zatrymańnia, jak miarkuje abarona, Aviarjanava mahła raźličvać jak minimum na chatni aryšt.
Fihurantam rasśledavańnia biełaruskich pravaachoŭnikaŭ taksama źjaŭlajecca Juryj Aviarjanaŭ. Pa prośbie Hienprakuratury Biełarusi jaho dla ekstradycyi zatrymali ŭ Hiermanii, adnak zatym biznesmen byŭ vyzvaleny z-pad varty i čakaje rašeńnia sudovych instancyj pa svajoj spravie pad padpiskaj.
