Ujaznuju viežu Staroha karaleŭskaha zamka ŭ Hrodnie ŭpryhožać partretami histaryčnych asob, hierbami i ŭzorami. Nad dekoram ciapier pracuje hrupa minskich mastakoŭ-manumientalistaŭ, paviedamili na STB.
Rośpis vykonvajuć u technicy shrafita — heta raźba pa syroj tynkoŭcy. Taki sposab viadomy jašče z časoŭ Siaredniaviečča. Praca składanaja — treba akuratna płastami vykłaści kalarovuju tynkoŭku i ź juvielirnaj dakładnaściu, pakul nie zastyŭ materyjał, vyrazać abjomnyja malunki i arnamient — i ŭsio heta na vyšyni kala 14 mietraŭ.
Mastaki zaraz pracujuć nad 14 partretami rymskich impierataraŭ, karaloŭ polskich i vialikich kniazioŭ litoŭskich — za asnovu ŭziatyja histaryčnyja fakty. Viežu taksama ŭpryhožać lvy, hryfony, kvietkavyja i fruktovyja hirlandy.
— Unizie taksama buduć vykarystoŭvacca i pa ścienach šmat usialakich arnamientaŭ. Uvachodnaja kampazicyja — tam buduć vykarystoŭvacca dźvie sceny — heta ŭjezd u Jerusalim i ŭjezd u Hrodna. Tut budzie kala 300 kvadrataŭ shrafita. Usio, viadoma, u hetym hodzie naŭrad ci my paśpiejem, tamu raboty buduć pieraniesieny jašče i na viasnu, — kaža Vasil Ziańko, staršynia manumientalnaj siekcyi Biełaruskaha sajuza mastakoŭ.
Rekanstrukcyja Staroha zamka praciahvajecca z 2017 hoda. Za asnovu prajekta ŭziataja adzinaja hraviura z vyjavaj zamka 16 stahodździa, jakaja zachavałasia. U płanach da kanca hoda zaviaršyć uźviadzieńnie viežy i kamianicy, ustavić vokny i prystupić da ŭnutranaha azdableńnia. Zaraz idzie zborka karkasa kupała ŭjaznoj viežy. U chutkim časie jaho pačnuć pakryvać miedździu.