Fota z telehram-kanała «Minsk i minčanin»
«Harramaŭtadar» adkazaŭ Ministerstvu kultury na zapyt ab nieabchodnaści pierafarbavać žoŭtyja vazy na praśpiekcie Niezaležnaści. Viarnuć balustradzie histaryčny koler paabiacali ŭ nastupnym hodzie, piša tut.by.
Supracoŭniki Ministerstva kultury niadaŭna napisali zapyt u Minharvykankam - pra toje, što vazy treba pierafarbavać u ich histaryčny koler. Haradskija ŭłady pieraadrasavali zapyt u «Harramaŭtadar», u jakoha vazy na praśpiekcie znachodziacca na bałansie. Pradpryjemstva patłumačyła, što pracy vykanajuć ŭ nastupnym hodzie.
- Pa infarmacyi «Harramaŭtadara», ciapier pa zamovie Kamiteta architektury i horadabudaŭnictva Minharvykankama raspracoŭvajecca kancepcyja dobraŭparadkavańnia praśpiekta Niezaležnaści na ŭčastku ad vulicy Śviardłova da płoščy Pieramohi. Ad vulicy Janki Kupały da płoščy Pieramohi adrestaŭrujuć balustrady. Uličvajučy heta, a taksama toje, što nastupiŭ niespryjalny pieryjad dla praviadzieńnia rabot, u «Harremaŭtadary» ličać niemetazhodnym pierafarboŭvać vazy sioleta, — tłumačyć načalnik upraŭleńnia pa achovie historyka-kulturnaj spadčyny Ministerstva kultury Natalla Chvir.
Rekanstrukcyju ŭ hetaj častcy horada ŭžo pačali: restaŭrujuć manumient Pieramohi, na praśpiekcie zamianili lichtary i apory słupoŭ.
Ministerstva kultury ŭžo nie raz pisała ŭ Minharvykankam, što vazy treba pierafarbavać. Zaraz zastajecca čakać.
«Harramaŭtadar» padparadkoŭvajecca Minharvykankamu, tamu apošni moža paŭpłyvać na svaju arhanizacyju.
— U adpaviednaści z Zakonam «Ab miascovym kiravańni i samakiravańni» ŭ horada jość paŭnamoctvy ažyćciaŭlać kantrol i pravodzić mierapryjemstvy pa achovie historyka-kulturnaj spadčyny. U ich jość infarmacyja pra toje, jakoje kalarovaje rašeńnie ŭzhodniena Minkultury, heta ich zadača kantralavać padobnyja pytańni. My ž sprabujem vyrašyć heta cyvilizavana i pakazvajem na nieabchodnaść vykanańnia patrabavańniaŭ zakanadaŭstva, — tłumačyć Natalla Chvir.
U Ministerstvie kultury tłumačać: pierad tym jak vykonvać raboty pa afarboŭcy fasadaŭ budynkaŭ, zbudavańniaŭ, architekturnych elemientaŭ, pa zakonie nieabchodna vykanać navukova-daśledčyja raboty, u jakija ŭvachodzić kompleksnaje navukovaje daśledavańnie, a taksama fizika-chimičnaje daśledavańnie składu farby, jakaja ŭžyvałasia pieršapačatkova. Ciapierašniaja žoŭtaja farba nie adpaviadaje prajektu i rekamiendacyjam śpiecyjalistaŭ, jakija rabili ekśpiertnaje zaklučeńnie.
