Uładzimir Maroz staŭ adzinym z čatyroch praciŭnikaŭ akumulatarnaha zavoda pad Brestam, jakoha zarehistravali kandydatam u deputaty, paviedamlaje Tut.by.
Fota: Raman Kiślak.
Uładzimir Maroz bałatujecca pa Bresckaj-Pamiežnaj vybarčaj akruzie №4. Vyłučaŭsia dvuma sposabami: praz zbor podpisaŭ i ad Abjadnanaj Hramadzianskaj partyi. Niahledziačy na toje, što mužčyna atrymaŭ padtrymku 1230 hramadzian, jaho zarehistravali kandydatam mienavita ad partyi.
Jak pryznaŭsia bieraściejec, nadziei na toje, što jon projdzie ŭ nastupny etap vybarčaj kampanii, u jaho było mała.
— Ja ž bačyŭ, jak adpravili našych kandydataŭ u kandydaty. Sumnieńniaŭ, što i mianie tak ža adpraviać, praktyčna nie było. Ale pryjemna ździŭleny, — patłumačyŭ surazmoŭca.
Siońnia Uładzimir Maroz zabiare paśviedčańnie kandydata i prystupić da ahitacyi. U najbližejšyja dni jon ahučyć svaju padrabiaznuju prahramu. Jak adznačyŭ kandydat, adzin z hałoŭnych jaje punktaŭ — baraćba za ekałohiju.
— Naša mierkavańnie pa akumulatarnym zavodzie nie źmianiłasia. Viadoma, hetu vytvorčaść varta zakryć. Nam jano niepatrebna, — paviedamiŭ Uładzimir Maroz.
Nahadajem, akramia Uładzimira Maroza ŭdzielničać u parłamienckich vybarach chacieli jašče try ŭdzielniki kampanii suprać akumulatarnaha zavoda: Raman Kiślak, Alaksandr Kabanaŭ i Alena Makarevič. Im u rehistracyi admovili.
