Haradskaja rada Biełastoka pastanaviła źmianić nazvu vulicy, jakaja nasiła imia Zyhmunta Šendzielaža «Łupaški», polskaha antykamunistyčnaha padpolščyka. Historyki kažuć, što jaho padnačalenyja zabivali biełarusaŭ u vioskach Biełastoččyny, paviedamlaje Radyjo Svaboda.
Za źmienu nazvy vulicy prahałasavali 13 deputataŭ, 12 byli suprać. Ciapier byłaja vulica Łupaški budzie nazyvacca Padlaskaj. Nazvać adnu z vulic Biełastoka ŭ honar Zyhmunta Šendzielaža «Łupaški» haradskaja rada pastanaviła ŭ krasaviku 2018 hoda.
Suprać nadańnia vulicy ŭ Biełastoku imia Łupaški letaś vystupali miascovyja ludzi, jak biełarusy, tak i palaki. Na vulicy Łupaški nieviadomyja pisali na aharodžach «Zabojca» i kleili nalepki. Polskija nacyjanalisty navat patrulavali vulicu z metaj abaranić šyldy ad niazhodnych.
10 traŭnia 1945 hoda polskija padpolščyki, padnačalenyja Zyhmunta Šendzielaža «Łupaški», spalili na Biełastoččynie biełaruskuju viosku Viluki. Byŭ zabity žychar vioski Vasil Hiermaniuk. 22 maja padnačalenyja Łupaški spalili viosku Patoki.
Padčas pažaru zahinuli troje dziaciej — Mikałaj Hierasimčuk (10 hadoŭ), Nina Hierasimčuk (8 hadoŭ) i Jaŭhienija Hierasimčuk (6 hadoŭ). Za tydzień da hetaha toj samy atrad rasstralaŭ čatyroch žycharoŭ Patokaŭ — Jana Biekiša, jahonaha 15-hadovaha syna Uładzimira, a taksama bratoŭ Jana i Uładzimira Małašeŭskich. Ich abvinavacili ŭ simpatyjach da kamunistyčnaj ułady.
