Upieršyniu ŭ troch haradach adnačasova — Oršy, Viciebsku, Homieli — na «Dziady» aktyvisty i naščadki represavanych abjadnalisia, kab začytać usłych imiony rasstralanych u časy stalinskich represij.
Padčas akcyi, pryśviečanaj pamiaci achviaraŭ palityčnych represijaŭ, u Homieli na Navabielickich mohiłkach prajšła ekskursija, paśla jakoj nastajaciel chrama śviaščennamučanika Alaksija Lelčyckaha adsłužyŭ panichidu. Hamielčuki ŭparadkavali staryja mahiły i začytali imiony achviaraŭ Vialikaha teroru.
U Viciebsku kala narodnaha memaryjału ŭ Chajsach katalicki biskup Aleh Butkievič pamaliŭsia za biełarusaŭ, rasstralanych u hady represij. Aktyvisty pamianuli zabitych u Viciebskaj turmie NKVD, u pryvatnaści Volhu Dancyt - nastaŭnicu 30-j škoły Viciebska. Asoba 28-hadovaj nastaŭnicy-łatyški była vyśvietlenaja, dziakujučy hrabieńčyku z nadrapanym imiem, jaki znajšli padčas žudasnych raskopak u lesie kala vioski Chajsy. Niadaŭna na hetym miescy byŭ ustalavany pomnik, na jakim napisanyja imiony Volhi Dancyt i 41 łatyša, rasstralanych u tuju ž noč - 30 krasavika 1938 hoda. Kaardynatar inicyjatyvy «Chajsy - viciebskija Kurapaty» Jan Dziaržaŭcaŭ nazvaŭ imiony rasstralanych u Viciebsku mastakoŭ.
U Oršy na Kabylackaj hary sabralisia miascovyja aktyvisty i naščadki rasstralanych, abjadnanych u inicyjatyvu «Kabylaki. Rasstralanyja ŭ Oršy». Niekatoryja z naščadkaŭ pryjechali na heta trahičnaje miesca ŭpieršyniu, kab ušanavać pamiać rodnych. Miesca masavaha pachavańnia achviaraŭ stalinskich represij na Kabylackaj hary było vyjaŭlenaje ŭ 1982 hodzie pry budaŭnictvie čyhunki.
Udzielniki akcyi praviali «subotnik» na miemaryjale i začytali proźviščy zabitych NKVD. Ajciec Alaksandr adsłužyŭ lityju ab usich zabitych i začytaŭ imiony 18 rasstralanych u Oršy pravasłaŭnych śviataroŭ.
Siońnia viadomyja proźviščy kala 2 tysiač čałaviek, rasstralanych aršanskim NKVD. Na dumku daśledčykaŭ, hetaja ličba moža być značna bolšaj. Ale daviedacca poŭny śpis achviar teroru ŭ Biełarusi pakul nie ŭjaŭlajecca mahčymym. Archivy KDB da hetaha času zakrytyja dla ahulnaha dostupu.
