Palinie Niemcavaj — 16 hadoŭ. 15 ź ich jana žyvie ŭ pryjomnaj siamji ŭ Klimavičach: Palinu i jaje starejšuju siastru Kryścinu zabrali, kali ich bijałahičnaja maci sieła ŭ turmu. Palinie było 9 miesiacaŭ, Kryścinie — 5 hadoŭ.
Paśla dziaŭčynki trapili ŭ roznyja siemji. Ciapier Palina vyrasła i sprabuje znajści siastru.
Svaju historyju Palina raspaviała «Našaj Nivie».
Palina, fota z sacsietak
«Ja rodam z Klimavič. Žyła tam z mamaj i starejšaj siastroj Kryścinaj. My rodnyja siostry, ale ad roznych tataŭ. Kryścina starejšaja za mianie na 5 ci 6 hadoŭ — dakładna skazać ja nie mahu.
Kali mnie było 9 miesiacaŭ, adbyłasia biada: mamu pasadzili. Jana vypivała, i štości zdaryłasia… Što dakładna, užo nichto i skazać nie moža, va ŭsich roznyja viersii. Zdajecca, jana raźbiła hałavu svajoj maci, majoj babuli, — kaža Palina. — U vyniku mamu asudzili. Moj baćka na toj momant taksama siadzieŭ u turmie, dzie byŭ baćka Kryściny, ja nie viedaju.
Heta byŭ 2003 hod. Mianie ź siastroj zabrali sacyjalnyja słužby. Pieradali toj samaj babuli. Ale jana taksama vypivała. I adnojčy da jaje pryjšli z pravierkaj, babula była nie mocna pjanaja, ale trochi napadpitku, i skazała: ja nie mahu zabiaśpiečyć hetych dziaciej, ci dapamažycie mnie, ci što…
U vyniku ad babuli nas taksama zabrali. My trapili ŭ klimavickuju balnicu. Tudy pryjechała niejkaja siamja z Babrujska, zabrali Kryścinu. A ja zastałasia».
Siońnia Palina zadajecca pytańniem: čamu dźviuch siaścior raźjadnali? Adkazu niama.
Ale nieŭzabavie znajšłasia siamja, jakaja vyrašyła zabrać i maleńkuju Palinu.
«Siamja była z Klimavičaŭ. Maja pryjomnaja maci pracavała achoŭnikam. Jana vielmi dobraja, ale baćka… Jon byŭ narkamanam, nieŭzabavie jany raźvialisia. Kali mnie było 2 hady, jon jašče byŭ na maim dni narodzinaŭ, navat fota jość. Paśla ŭžo źnik, ja jaho bolš i nie bačyła, — uzhadvaje Palina. — A sioleta ŭ kastryčniku nam paviedamili, što jaho znajšli miortvym — paviešanym. My daviedalisia pra heta ŭžo navat paśla pachavańnia. Pachavali jaho kamunalnyja słužby, nichto sa svajakoŭ i nie viedaŭ pra heta».
Pryjomnaj maci dziaŭčyny dazvolili pakinuć Palinu. Jana hadavała jaje jak rodnuju dačku. Pra toje, što nasamreč jana pryjomnaja, Palina daviedałasia ad babuli.
«Mnie było hadoŭ niedzie 11—12. Było niejkaja śviata, i babula, mama majoj pryjomnaj matuli, raptam pazvaniła mnie. Kaža: ty što robiš? Adkazvaju: ničoha, televizar hladžu. Jana: a mamka dzie? Kažu: na pracy.
Tady babula kaža: ja tabie zvaniu štości raskazać. Ty viedaješ, što hetaja mama tabie nie rodnaja?»
Palina kaža, što spačatku nie pavieryła babuli. Matyvy, čamu babulu raptam prabiła na takuju ščyraść, taksama nieviadomyja. Ale pryjomnaj maci Palina vyrašyła ničoha nie kazać, kab jaje nie rasstrojvać.
Nieŭzabavie Palina trapiła ŭ balnicu. I tam jaje rodnaja maci sama jaje znajšła.
«Nakolki ja viedaju, joj skazaŭ chtości ź miedpiersanała: maŭlaŭ, tut tvaja rodnaja dačka lažyć. Adkul jany heta viedali, ja nie ŭjaŭlaju, — kaža Palina. — U vyniku padyšła da mianie žančyna, kaža: ja tvaja rodnaja mama. Pakazvaje fotku majho bijałahičnaha baćki — a my ź im vielmi padobnyja, jak dźvie kropli. Ja adrazu joj pavieryła. I ŭ mianie zdaryłasia isteryka».
Paśla bijałahičnaja mama i raskazała dačce historyju, jak taja trapiła ŭ pryjomnuju siamju. Akazałasia, paśla vychadu z turmy žančyna znoŭ vyjšła zamuž. Naradziła jašče dvaich dziaciej, chłopčyka i dziaŭčynku.
Paśla vychadu z balnicy dziaŭčynka pahavaryła z pryjomnaj mamaj. Taja pryznałasia: tak, usio praŭda, Palina joj nie rodnaja.
Ale pryjomnaja maci spačatku nie dazvalała Palinie stasavacca ź bijałahičnaj mamaj.
«Ja joj skazała tady: davaj ty nie budzieš kryŭdavać. Ja chaču chacia b sa svajoj siastroj i bracikam bačycca. Nu i pryjomnaja mama niejak źmiryłasia, navat dazvalała mnie jeździć u hości. Ciapier maja bijałahičnaja mama žyvie z mužam i dziećmi pad Klimavičami, u vioscy. U studzieni ja jeździła na dzień narodzinaŭ bracika, pryviezła maleńki padarunak. Pasiadzieli z rodnaj mamaj, pahavaryli. Paśla ja chacieła jašče da siastry pryjechać na dzień narodzinaŭ, ale nie zmahła: nie było hrošaj», — kaža Palina.
Ciapier Palina padrasła i vyrašyła, što choča adšukać Kryścinu.
«Usio, što ja viedaju, — heta što jaje zavuć Kryścina. Imia pa baćku Iharaŭna. Proźvišča ja dakładna nie viedaju: dziavočaje proźvišča majoj bijałahičnaj mamy Chakinian. Paśla taho, jak jana vyjšła za majho baćku, źmianiła na Markoŭskuju. Ale jakoje proźvišča było ŭ Kryściny, ja skazać nie mahu, — kaža Palina. — Viedaju jašče, što Kryścina nibyta ŭžo zamužam — pra heta mnie kazała bijałahičnaja mama. Ale za kim jana zamužam i jakoje ŭ jaje siońnia proźvišča, mama ci to mnie nie paviedamlała, ci to sama nie viedała».
Udakładnić štości ŭ svajoj bijałahičnaj maci Palina ŭžo nie moža: žančyna niekudy prapała paŭhoda tamu.
Pa słovach Paliny, jaje rodnaja mama ŭ krasaviku iznoŭ lahła ŭ balnicu — čarhovy raz zaciažaryła, ale pačalisia prablemy. Daviałosia rabić apieracyju, žančyna straciła płod.
Praz tydni dva paśla vychadu z balnicy žančyna źnikła. Jaje muž, jaki zastaŭsia z dvuma dziećmi na rukach, čakaŭ až usio leta, i tolki ŭ kancy žniŭnia źviarnuŭsia ŭ milicyju: maŭlaŭ, žonka źnikła. Jak kaža Palina, jon nibyta prosta spadziavaŭsia, što znojdziecca i sama pryjdzie.
«Jaje i pa siońnia niama. Dzie jana — nieviadoma. Pra jaje źniknieńnie mnie ŭvohule paviedamiła susiedka», — kaža Palina.
Tamu dziaŭčyna prosić adhuknucca kahości, chto viedaje choć što-niebudź pra jaje siastru. Kali vy viedajecie, jak znajści Kryścinu, to možacie paviedamić u «Našu Nivu», Redakcyja pieradaść infarmacyju Palinie.
