Kadr ź filma «Plaž/les/tambur» Kiryła Halickaha i Śviatłany Kazłoŭskaj, jaki pieramoh u nacyjanalnym konkursie «Listapada».
Hran-pry 26-ha Minskaha mižnarodnaha kinafiestyvalu «Listapad» atrymaŭ ukrainski film «Atłantyda» režysiora Valancina Vasianoviča.
Raniej hety film atrymaŭ pryz u prahramie «Haryzonty» Vieniecyjanskaha kinafiestyvalu.
Siužet «Atłantydy» taki. Uschodniaja Ukraina, niedalokaja budučynia. Terytoryja małaprydatnaja dla žyćcia čałavieka. U byłoha sałdata Siarhieja, jaki pakutuje na posttraŭmatyčny stres, uźnikajuć prablemy z adaptacyjaj da novaj realnaści. Kali mietałurhičny zavod, na jakim jon pracuje, začyniajecca, Siarhiej pačynaje supracoŭnictva z humanitarnaj misijaj, meta jakoj — pošuk i ekshumacyja ciełaŭ zahinułych voinaŭ. Pracujučy razam z Kaciaj, jon razumieje, što lepšaja budučynia mahčymaja…
Voś trejler:
U nacyjanalnym konkursie najlepšym hulniavym filmam staŭ «Plaž/les/tambur» Kiryła Halickaha i Śviatłany Kazłoŭskaj.
Najlepšaj dakumentalnaj stužkaj «za elehiju pra čałaviečuju vosień» stała «Summa» Andreja Kuciły. Jašče adzin film Andreja Kuciły «Stryptyz i vajna» (abodva filmy źniatyja pry ŭdziele telekanała «Biełsat»), byŭ adznačany specyjalnym pryzam žury.
Žury asnoŭnaha konkursu ŭznačalvaŭ kubinski režysior Karłas Kinteła. Žury biełaruskaha nacyjanalnaha konkursu ŭznačalvaŭ metr polskaha kiniematohrafa Kšyštaf Zanusi.
«Listapad» prachodziŭ z 1 pa 8 listapada pad słohanam «Da radaści». U hetym hodzie na im pakazali bolš za 150 filmaŭ z 50 krain. Upieršyniu na fiestyvali byli pradstaŭlenyja karciny z Sudana i Sieniehała. Zasnavalnikami forumu vystupajuć Ministerstva kultury i Minharvykankam.
«Stryptyz i vajna» Andreja Kuciły
Asnoŭny konkurs dakumentalnaha kino.
Viadoma, pierš za ŭsio film čaplaje hetym žyćciovym kazusam: padpałkoŭnik u adstaŭcy prasuje sceničny ručnik unuku-stryptyzeru. To bok dva dyjametralna roznyja čałavieki sutykajucca na ahulnych kvadratnych metrach i zastajucca adzin dla adnaho blizkimi ludźmi. Ale aproč hetaha — redkim dla biełaruskaha ekranu daśledavańniem, jak u našym siońniašnim žyćci spałučajucca savieckaja spadčyna i novy čas, a heta nadzvyčaj cikavy miks.
Praz procilehłuju idealohiju hierojaŭ i ŭvasoblenaje ŭ dziaduli z unukam prymireńnie minułaha z sučasnaściu (i navat bolš, čym prymireńnie) možna lepš zrazumieć, dzie my žyviem. Nu i bonus: karcina zdymałasia ciaham čatyroch hadoŭ, tamu (čym asabliva admietnaje dakumentalnaje kino) jana zaśpieła i adlustravała źmieny ŭ svaich hierojach. Źmieny za čatyry hady i niaźmieny za dvaccać vosiem.
«II» Ułady Siańkovaj
Specyjalny pakaz u pazakonkursie mastackaha kino.
Biełaruskaja premjera novaj stužki Ŭłady Siańkovaj pryznačanaja na viečar 4 listapada, ale karcinu ŭžo viedajuć u Polščy, dzie adbyłasia premjera suśvietnaja: pieršym ź biełaruskich filmaŭ «II» byŭ adabrany ŭ konkursnuju sekcyju Varšaŭskaha kinafestyvalu i, bolš za toje, udastojeny na forumie Asobnaj zhadki žury.
Siužet raspaviadaje pra dziesiaciklaśnikaŭ, zvyčajnaje žyćcio jakich pieraryvaje peŭnaja navina, što musić vykryć sapraŭdnuju dušu školnaj supolnaści albo navat pakaleńnia. Kažuć, karcina zakranaje takija baki biełaruskaj rečaisnaści, zhadvać jakija ŭ našym hramadztvie nia pryniata.
Ułada Siańkova, jakaja niadaŭna stała studentkaj znakamitaj Škoły Andžeja Vajdy ŭ Polščy, źjaŭlajecca aŭtarkaj filmaŭ «Hraf u apelsinach» i «Paranoid Android», a ŭ cełym — adnym z samych perspektyŭnych biełaruskich kinarežyseraŭ.
«Čystaje mastactva» Maksima Švieda
Nacyjanalny konkurs.
Kali supracoŭnicy ŽESu zamaloŭvajuć nadpisy «Maja kraina Biełaruś» i «Usim pa 500», mienskija pabudovy ŭpryhožvajucca adsyłkami da avanhardu. Hetaja hieametryja natchniaje mastaka Zachara Kudzina, i jon vychodzić na vulicu pisać svaje tvory.
«Čystaje mastactva» možna ličyć jašče adnoj karcinaj pra biełaruskuju rečaisnaść, ale pra jaje tut — paŭsłovami i paŭtonami, tonka i dyplamatyčna. Hladzieć na nacyjanalny arnament za sietkaj i ŭ hety ž čas słuchać razmovu pra niedastatkovaść urokaŭ pa biełaruskaj u škole — usio zrazumieła, dziakuj. Akazvajecca, prysutnaść u haradzkoj prastory z čystym pałatnom — ryzykoŭnaja sprava. Ty pasiahaješ na pieradavyja katehoryi, XXI stahodździe, svabodnaje volevyjaŭleńnie, a natykajeśsia na amal što «Big brother is watching you». Tak u filmie pišucca nie tolki karciny, ale i vobraz maładoj krainy.
«Sašava piekła» Mikity Łaŭreckaha
Nacyjanalny konkurs.
Karcina adnaho z samych nieadnaznačnych sučasnych biełaruskich režyseraŭ, kinakrytyka, mahistra kinaznaŭstva, navukovaha supracoŭnika Centru sučasnych mastactvaŭ, laŭreata «Listapadu» i bła-bła-bła.
Premjera źniataha na VHS ema-chorara ŭ svoj čas adbyłasia na Maskoŭskim kinafestyvali, i časopis «Sieans» paviedamiŭ, što krytyki rasiejskaj stalicy paličyli film adnym z najlepšych na hetym forumie.
Da hałoŭnaha hieroja Sašy pryjaždžaje z Belhii reper Oli, jaki ŭžo maje niejkuju kolkaść prychilnikaŭ i planuje dać kancert u mienskaj prastory Ok16. Dahetul siabry ŭžyvuju nie sustrakalisia, zatoje paśla sustrečy prajaviać siabie napoŭnicu, i da čaho hety miły sumiesny ŭikend pryviadzie, strašna skazać.
«Chroniki rtuci» Biena Hieza i Sašy Kułak
Nacyjanalny konkurs.
My dahetul pamiatajem stylnuju i nadryŭnuju «Sałamanku», źniatuju ŭ meksykanskaj supołcy menanitaŭ. Biełaruska Saša Kułak źjaŭlajecca suaŭtaram karciny, adpaviedna «Chroniki rtuci» adrazu pryciahnuli našu ŭvahu. I praŭda, režyserka znoŭ trapiła tudy, kudy treba, i tady, kali treba.
U zakinuty šachciorski haradok Novaja Idryja niedzie ŭ ZŠA z dvuma čałaviekami nasielnictva. Vakoł zakinutaja i maŭklivaja pusteča, zatoje ludzi siarod jaje — bolš kalarytnych niama. Usio razmovy, badziańnie tudy-siudy, prezydenckaja honka Trampa pa telebačańni, fatahrafavańnie, zvyčajnaje baŭleńnie viečarovaha času, a potym — raz! — i adbyvajecca niešta takoje, što pa svaim uniosku ŭ dramaturhiju vyklikaje paraŭnańnie ź siužetnym pavarotam dobraha scenaru mastackaha filmu.
«Chroniki rtuci» — navat nie dakumentalnaje nazirańnie, a ŭpivańnie navakollem Novaj Idryi. I tak, my možam prynamsi ŭbačyć, što nia tolki biełaruskija vioski stajać zakinutymi i niamymi.
