Učora Alaksandr Łukašenka sustreŭsia z premjer-ministram Abjadnanych Arabskich Emirataŭ šejcham Muchamiedam bien Rašydam al-Maktumam. U liku inšaha kiraŭnik dziaržavy abmierkavaŭ ź im stvareńnie z dapamohaj AAE mižnarodnaha finansavaha centra ŭ Minsku. Tut.by daviedaŭsia, dzie moža raźmiaścicca hety abjekt.
Jak raspaviali partału niekalki infarmavanych krynic, pakul u jakaści asnoŭnaj placoŭki pad finansavy centr razhladajecca paŭnočny bierah Śvisłačy ŭ rajonie vadaschovišča Drazdy. Prykładnyja miežy ŭčastka vyhladajuć tak:
Skrynšot: tut.by.
Miarkujecca, što ŭ finansavym centry buduć nie tolki dziełavaja, zabaŭlalnaja i turystyčnaja zony, ale i mižnarodny vystavačny kompleks. «Heta budzie najbujniejšy inviestprajekt. Płošča — da tysiačy hiektaraŭ », - kaža adzin z surazmoŭcaŭ partała.
Ciapier arabskija inviestary rychtujuć kancepcyju kompleksu, jakaja ŭ vyniku laža na stoł Alaksandru Łukašenku. Apošniaje słova budzie za im, bo dla realizacyi takoha prajekta treba prymać ukazy prezidenta.
Pa-pieršaje, treba budzie ŭnosić źmieny ŭ Hienpłan Minska, kab vyvieści z abarotu vornyja ziemli, na jakich chočuć budavać fincentr. Pa-druhoje, dla padobnych prajektaŭ zvyčajna vyznačajecca inšy padatkovy režym.
Adznačym, što šejch Machamied kantralavaŭ stvareńnie vialikaj kolkaści transnacyjanalnych biźnies-prajektaŭ, u tym liku budaŭnictva samaha vysokaha budynka ŭ śviecie — Burdž-Chalifa. Machamiedu naležać dva šmatprofilnyja kanhłamieraty — Dubai World i Dubai Holding, jakija zajmajucca budaŭnictvam, finansami, turyzmam, telekamam, pieravozkami, łahistykaj.
