My z fatohrafam Nadziejaj Bužan pryjšli na ŭčastak №415 na vulicy Daniły Sierdziča ŭ Minsku.
Čamu mienavita siudy?
Pa-pieršaje, učastak znachodzicca na Puškinskaj akruzie № 103. Heta adna ź dźviuch akruh u Minsku, dzie apazicyja zdoleła arhanizavać paŭnavartasnaje nazirańnie. Pradstaŭnicy kampanii «Prava vybaru» znachodzilisia na kožnym učastku na praciahu ŭsiaho času daterminovaha hałasavańnia. U takoj situacyi nachabna falsifikavać składaniej.
Pa-druhoje, heta adzin ź niekalkich učastkaŭ, dzie ličby jaŭki kamisii i niezaležnych naziralnikaŭ amal supadali. Niaŭžo jašče i paličać sumlenna?
Davajcie hladzieć na praces.
Spačatku paznajomimsia sa staršynioj kamisii.
Ina Piatyha vyłučanaja ad Kamunistyčnaj partyi. Huhł kaža, što jana nastaŭnica-defiektołah u hetaj škole, a jašče ŭznačalvaje prafsajuznuju arhanizacyju. Nu i try razy vyjhravała niešta ŭ łatarei «Jeŭraopta».
Tak supała, što dla Iny Piatyha heta pieršyja vybary na pasadzie staršyni kamisii. Jana ščyra chvalujecca, jak by čaho nie vyjšła. A tut ŭviečary na jaje ŭčastak zvalilisia dva žurnalisty, dy jašče i psieŭdanaziralniki ad SND. Kaniečnie, jany biaskryŭdnyja, i im usio abyjakava, ale tym nie mienš.
U vyniku ličby ŭ Piatyhi nie syducca, ale pra heta paźniej.
Usie členy kamisii — žančyny. U pryncypie, i siarod naziralnikaŭ tolki adzin mužčyna, z vyhladu trudavik ci fizruk.
Členy kamisii nie chočuć, kab ich fatahrafavali. Asabliva aburajecca Iryna Astaševič, na zdymku jana druhaja źleva. Raniej jana była dyrektarkaj hetaj škoły, ale niešta pajšło nie tak.
20:00, učastak zakryvajecca. Damy z kamisii pačynajuć ličyć, kolki čałaviek u ich atrymali biuleteni. A my staranna fatahrafujem uzmachi arkušaŭ.
U levaj pradstaŭnicy kamisii atrymaŭ biuleteń adzin čałaviek z vaśmi, u pravaj — dva ź dzieviaci:
Tut — adzin ź siami:
Adzin z vaśmi:
E-e-e, uvohule nichto ź siami…
Karaciej, naš ekspres-test pakazvaje 5 podpisaŭ z 31 mahčymaha. Vybarka tak sabie, ale heta kala 16%.
Ciapier karotkaja tablička aficyjnych źviestak.
| Hałasavańnie na ŭčastku №415 | daterminova | doma | asnoŭny dzień | ahułam |
| naziralniki | 374 | 11 | 347 | 732 (54%) |
| kamisija | 378 | 11 | 413 | 798 (59%) |
Voś stolki čałaviek prahałasavali na ŭčastku. Roźnica — 66 hałasoŭ.
Pry hetym staršynia kamisii pry pieršym znajomstvie ŭ 17:30 ščyra pryznałasia mnie: pakul prahałasavali 328 čałaviek. To bok za apošnija pustyja hadziny adniekul nibyta nabiehła amal sotnia vybarcaŭ. Cyrk na drocie.
Darečy, pryblizna ŭ hety čas niejki durań uklučyŭ pažarnuju sihnalizacyju, jakaja raŭła chvilin 20. Nichto z členaŭ kamisii navat nie zvaruchnuŭsia, ciškom aburałasia tolki žančyna, jakaja supravadžała naziralnikaŭ ad SND.
Tym časam nievykarystanyja biuleteni pahašajucca, ad ich adrazajecca vuhałok.
Staršynia kamisii z namieśnicaj ciahnuć skrynku daterminovaha hałasavańnia da stałoŭ. Vidać, abiacanyja try mietry ad naziralnikaŭ jakraz i jość. Ale što adbyvajecca na stałach, nie vidać ni chalery. Adzinaje vyratavańnie — abjektyŭ kamiery.
Paśpiavajem zaŭvažyć, jak sa skrynki elehantna vyvalvajecca stosik składzienych papierak. Heta niesartavanyja biuleteni, składzienyja absalutna adnolkava. Vy možacie navučyć ź dziasiatak čałaviek zakinuć ich adzin za adnym tak, kab lahli nastolki roŭna?
Biuleteni vykidajucca na stoł i advolna dzielacca pamiž pravaj i levaj hrupami členaŭ kamisii, u kožnaj pa čatyry čałavieki. Raskłaŭšy biuleteni pa stosikach, jany pišuć na papiercy atrymanyja ličby. Paśla staršynia zachodzić u hłybiniu zały, razvaročvajecca śpinaj i niešta ź imi robić. Što robić? Spytajcie ŭ jaje.
Jašče raz akcentuju ŭvahu: pravieryć, što i čamu kładziecca ŭ toj ci inšy słupok, niemahčyma.
Voś u kadr trapiŭ biuleteń za Kavalkovu. Ale šmat takich jašče? Naziralniki nie viedajuć.
A voś idzie padlik hałasoŭ za Vasila Panasiuka, heta staršynia Minharsavieta.
Ale adzin fejł złavić usio ž udajecca: heta stosik biuleteniaŭ, sapsavanych padčas daterminovaha hałasavańnia. Niechta pastaviŭ ptuški ŭsim kandydatam. U rukach u žančyny takich biuleteniaŭ siem. Pryčym heta tolki levaja častka stała, u pravaj ličać asobna. Paśla padliku staršynia kamisii ahučyła: ahułam u skryncy dla daterminovaha hałasavańnia było 5 sapsavanych biuleteniaŭ.
Nam ahučvajuć aficyjnyja vyniki daterminovaha hałasavańnia.
- Vasil Panasiuk (praŭładny kandydat, staršynia Minharsavieta) — 124 (33%)
- Alaksiej Alancevič (rabotnik «Minskdaviedki», idzie ad Partyi pracy i spraviadlivaści) — 73 (19%).
- Alaksandr Šmacin (kamunist z vajennaj kafiedry BNTU) — 65 (17%)
- Suprać usich — 51 (13%)
- Volha Kavalkova ź Biełaruskaj chryścijanskaj demakratyi — 30 (8%)
- Dzianis Tušynski (vykładčyk BDU, namieśnik staršyni TBM, ad Zialonych) — 30 (8%).
- Sapsavana — 5 biuleteniaŭ.
Sapsavanyja biuleteni — tyja, dzie paznačana bolš za adnu ptušku, albo jość niejki dadatkovy nadpis.
Nastupnaje — nadomnaje hałasavańnie. Tut usiaho 11 biuleteniaŭ. Heta hałasy ludziej, jakija pazvanili ŭ kamisiju i paprasili pryjści da ich dachaty.
Panasiuk atrymlivaje 5 hałasoŭ, Šmacin, Kavalkova i Alancevič — pa 1 hołasie, Tušynski — nul. Pry hetym akazvajecca, što try čałavieki zaprasili členaŭ kamisii, kab prahałasavać suprać usich. Voś heta pazicyja!
Narešcie dachodzić čarha da hałasavańnia ŭ hałoŭny dzień vybaraŭ. Tut, nahadaju, pamiž kamisijaj i nazirańniem jość raźbiežka na 66 hałasoŭ. Dzie jany ŭspłyvuć?
Vyniki ŭ dzień hałasavańnia:
- Vasil Panasiuk (praŭładny kandydat, staršynia Minharsavieta) — 180 (45%)
- Alaksandr Šmacin (kamunist z vajennaj kafiedry BNTU) — 75 (19%)
- Alaksiej Alancevič (rabotnik «Minskdaviedki», idzie ad Partyi pracy i spraviadlivaści) — 61 (15%).
- Suprać usich — 38 (10%)
- Volha Kavalkova — lidarka BCHD — 28 (7%)
- Dzianis Tušynski (vykładčyk BDU, namieśnik staršyni TBM, ad Zialonych) — 15 (4%).
- Sapsavana — 4 biuleteni.
Što kidajecca ŭ vočy?
Za pradstaŭnikoŭ apazicyi, jakija zaklikajuć vybarcaŭ nie chadzić na daterminovaje hałasavańnie, daterminova nibyta prahałasavali bolš, čym u asnoŭny dzień. U Dzianisa Tušynskaha — ažno ŭdvaja bolš.
Kamunist abahnaŭ rabotnika «Minskdaviedki», ale heta mała kamu cikava.
Nu i Vasil Panasiuk ŭsio ž atrymaŭ trochi bolš salidnuju ličbu, čym daterminova.
Ale tut pačynajecca samaje śmiešnaje. Padbivajučy kančatkovyja ličby, «zhubili» 12 biuleteniaŭ. Ich nibyta vydali vybarcam u dzień hałasavańnia — ale papierak nie znajšłosia ni ŭ adnoj skryncy.
Staršynia i jaje namieśnica zasiadali chvilin 15. Što rabić, što rabić? Pieraličvać biuleteni nie chočacca, prosta nakinuć na rachunak Panasiuka strašnavata.
Karaciej, było pryniata sałamonava rašeńnie — zrabić vyhlad, što tak i treba.
Na majo pytańnie, dzie ž 12 biuleteniaŭ, staršynia kamisii zrabiła zdahadku, što ich mahli vynieści vybarcy. To bok za ŭsie dni daterminovaha hałasavańnia nivodnaja pačvara nie ździejśniła takuju pravakacyju, a tut prosta łamanulisia.
U pratakoł tak i zapisali: vydali 802 biuleteni, znajšli 790 biuleteniaŭ. Dzie astatnija, šukajcie sami.
Takim čynam, vynik hałasavańnia pa ŭčastku №425 Puškinskaj akruhi №103.
- Vasil Panasiuk (praŭładny kandydat, staršynia Minharsavieta) — 39%.
- Alaksandr Šmacin (kamunist z vajennaj kafiedry BNTU) — 18%.
- Alaksiej Alancevič (rabotnik «Minskdaviedki», idzie ad Partyi pracy i spraviadlivaści) — 17%.
- Suprać usich — 12%.
- Volha Kavalkova ź Biełaruskaj chryścijanskaj demakratyi — 7%.
- Dzianis Tušynski (vykładčyk BDU, namieśnik staršyni Tavarystva biełaruskaj movy, ad Zialonych) — 6%.
