Padčas vybaraŭ u Pałatu pradstaŭnikoŭ była vydalenaja rekordnaja kolkaść naziralnikaŭ, raskazała dziaržaŭnamu telekanału ANT 24 listapada staršynia Centralnaj vybarčaj kamisii Lidzija Jarmošyna, piša Radyjo Svaboda.
Za ŭvieś čas vybaraŭ vydalili 105 naziralnikaŭ, ź jakich 35 za «falšyvyja dakumienty ab vyłučeńni» i 70 za «parušeńnie zakonaŭ», raskazała Jarmošyna. Paśla hetaha astatnija naziralniki «ŭžo padumali, što treba niejak inačaj siabie pavodzić, strymlivać siabie i pamiatać, što jany intelihientnyja ludzi».
Pavodle Jarmošynaj, «usie arhanizatary vybaraŭ» kažuć, što niadaŭniaja vybarčaja kampanija była «najbolš kanfliktnaj i skandalnaj». Ź niekatorymi z «arhanizataraŭ» navat sudzilisia, dadała jana.
«Asabliva jana [vybarčaja kampanija] była składanaja tym, što z momantu źjaŭleńnia naziralnikaŭ ABSIE, zachodnich naziralnikaŭ, asabliva karotkaterminovych, peŭnyja palityčnyja siły stali sprabavać dakazać i pakazać usiamu śvietu, što ŭ nas usio vielmi drenna», — adznačyła staršynia CVK.
Viadoŭca pieradačy Jury Hrojeraŭ zajaviŭ, što ŭ čas vybarčaj kampanii adbylisia pravakacyi, byli «ckavańnie i pieraśled» čalcoŭ vybarčych kamisijaŭ. Jarmošyna adkazała, što CVK «dapamahła rasstavić akcenty» ŭ hetych vypadkach.
«A našyja vybarčyja kamisii razhubilisia, razhubilisia vybarniki, — raskazała Jarmošyna. — Heta biełarusy, jany ž biezabaronnyja pierad nachabnikami. U nas jość takaja nacyjanalnaja rysa: my hublajemsia. Nachabnyja, ahresiŭnyja zadajuć ton čaściakom. Tamu našaja pamiarkoŭnaść, talerantnaść, jana, viadoma, tut vykonvaje peŭnuju rolu».
