Z paniadziełka biełaruski rubiel apuściŭsia z 2,0501 za dalar apuściŭsia da 2,1173 (pa stanie na 10.50 čaćviarha). Kurs rubla da jeŭra z paniadziełka apuściŭsia z 2,2685 da 2,3320. Čamu tak zdaryłasia?
Ci moža być, što rynak maje infarmacyju ad insajdaraŭ, što da 8 śniežnia Biełaruś i Rasija nie pryjduć da damoŭlenaściej i ličyć, što heta ŭdaryć pa biełaruskim rubli? Ci heta moža być vynik inśpiravany z Rasii cisk na biełaruskuju valutu ŭ čas, kali iduć vyrašalnyja pieramovy pa nafcie i hazie?
Što dumajuć ekśpierty pra hetuju situacyju? Ekanamist Dźmitryj Kruk miarkuje, što šukać niejkaj podbiŭki nie treba.
«Heta narmalnyja vahańni, kali kurs źjaŭlajecca płavajučym u peŭnym kalidory. Toje, što apošnija dni rubiel tak imkliva źniziŭsia ŭ adnosinach da dalara i jeŭra, śviedčyć, što popyt pavysiŭsia. Ale pakul niama padstaŭ kazać, što heta ŭstojlivaja tendencyja.
I na što tut treba źviarnuć uvahu: zaraz kurs viarnuŭsia pryblizna da siaredniehadavoha ŭzroŭniu. Da ŭzroŭniu 2,05 rubla za dalar my pierajšli paŭtara miesiaca tamu, a bolšuju častku hoda adnosiny byli bližej da 2,1. I kali na bolš prasunuty ekanamičny pakazčyk hladzieć — realny efiektyŭny valutny kurs, — tam apošnija miesiacy było nievialikaje pieraacanieńnie. Zaraz idzie viartańnie da bolš abhruntavanaha ŭzroŭniu. Tamu pakul nie baču nijakaj uzajemasuviazi ź mierkavanymi pieramovami», — kamientuje Dźmitryj Kruk.
Ci moža być, što rost dalara — heta cisk na biełaruskuju valutu ŭ čas, kali iduć vyrašalnyja pieramovy pa nafcie i hazie? Ekśpiert ličyć, što nie — da kanca hoda istotnych źmienaŭ u hetaj śfiery nie budzie.
Staršy analityk kampanii «Alpary» Vadzim Josub, kamientujučy pryčyny rostu kursu dalara, u niečym zhodny z papiarednim ekśpiertam.
«Mahu skazać, z čym heta dakładna nie źviazana. Nie dumaju, što heta niejkim čynam źviazana z sustrečaj 8 śniežnia.
Naohuł, kab valuta rasła, treba kab jaje niechta mocna kuplaŭ, bolš, čym jaje pradajuć. Ź ciažkaściu sabie ŭjaŭlaju pavodziny niejkich kampanij, a tym bolš nasielnictva, kab jano pajšło i kuplała valutu, bo chutka 8 śniežnia. Pryčym pačało heta rabić akurat u pačatku biahučaha tydnia, nie raniej i nie paźniej.
Ciapier pakul składana skazać, ci heta ŭstojlivy trend na rost dadzienaj valuty, jaki budzie praciahnuty, ci heta niejki karotkaterminovy faktar i ŭ bližejšy čas rost spynicca i kurs adkacicca nazad. Naprykład, u jakaści takoha karotkaterminovaha faktara mahła b być banalnaja pakupka valuty adnym ci niekalkimi bujnymi pradpryjemstvami.
U nas rynak valuty dastkovy maleńki, nizkalikvidny, i kali, dapuścim, niejkamu pradpryjemstvu treba apłočvać impartny kantrakt ci hasić valutnyja kredyty i jaho patreby ŭ valucie — heta niekalki dziasiatkaŭ miljonaŭ dalaraŭ, to pakupka takoj sumy na praciahu niekalkich dzion moža istotna pasunuć rynak.
Padobny rost kursa z nastupnym adkatam my nazirali ŭ kancy leta. Tak heta ci nie tak, zmožam mierkavać tolki praz čas».
