Pa vynikach «narmandskaha samitu», jaki adbudziecca 9 śniežnia ŭ Paryžy, prezident Ukrainy Uładzimir Zialenski čakaje prahresu pa dvuch napramkach. Pieršy ź ich — abmien pałonnymi, piša rbc.ru.
«My čakajem, što zmožam pravieści novy abmien pałonnymi, ale ŭ hety raz značna maštabniejšy», — skazaŭ jon u intervju, apublikavanym francuzskaj hazietaj Le Monde. Zialenski dadaŭ, što padčas sustrečy ź lidarami Francyi, Hiermanii i Rasii choča abmierkavać detali abmienu, u tym liku jaho terminy.
Pra toje, što Ukraina, samaabvieščanyja «respubliki» Danbasa i Rasija ŭzhadnili bazavy scenar abmienu «ŭsich na ŭsich», paviedamlali raniej krynicy RBK. Pavodle ich źviestak, havorka idzie ab abmienie 250 čałaviek, jakija znachodziacca va Ukrainie, i 100 čałaviek z boku DNR i ŁNR.
Druhi napramak, pa jakim Zialenski choča damahčysia zruchaŭ padčas pieramoŭ u Paryžy, — pieramirje na Danbasie. «Heta praŭda, što intensiŭnaść vajennych dziejańniaŭ źniziłasia z 2015 hoda, jak i kolkaść achviar, ale ŭsio roŭna [bajavyja dziejańni] nia spynienyja», - skazaŭ jon. Raniej Zialenski nazyvaŭ pieramirje ŭ Danbasie «fejkavym».
Pierachodzić da pytańnia vybaraŭ na paŭdniovym uschodzie Ukrainy možna budzie tolki paśla taho, jak buduć vyrašany pytańni z abmienam pałonnymi i pieramirjem, skazaŭ Zialenski. «Treba pravieści poŭnaje razzbrajeńnie, raźviadzieńnie ŭzbrojenych hrupovak, a taksama pazbavicca ad zbroi», — padkreśliŭ jon.
Akramia taho, Zialenski vykazaŭ niazhodu z punktam minskich pahadnieńniaŭ ab paradku praviadzieńnia vybaraŭ u ŁNR i DNR.
Zhodna z hetym punktam, adnaŭleńnie poŭnaha kantrolu za miažoj z boku ŭrada Ukrainy va ŭsioj zonie kanfliktu pavinna pačacca paśla miascovych vybaraŭ. «Ja nie zhodny z takoj paśladoŭnaściu padziej. Heta pazicyja ukraincaŭ, i my zachavajem ćviordaść [u hetym pytańni] », - skazaŭ jon.
