U kancy listapada ŭ Jekaciarynburhu znajšli cieła 9-hadovaha chłopčyka. Vyśvietliłasia, što jaho baćki — členy siekty «Vučni Chrysta», jakuju arhanizavała niejkaja Ziemfira Hajnulina, jakaja sama siabie nazyvaje Famar.
40-hadovy Ivan Kazancaŭ siek syna rozhami, zatknuŭšy małomu rot klapam. U vyniku, chłopčyk zadychnuŭsia, tady Kazancaŭ paklikaŭ Hajnulinu, kab taja ažyviła małoha. Nie atrymałasia. Tady cieła chłopca zakapali ŭ parku.
Ivan Kazancaŭ z žonkaj peŭny čas žyli ŭ Biełarusi: jon rasijanin, ale žonka maje biełaruskaje hramadzianstva. Biełarusam byŭ i ich zabity syn.
Ale niadaŭna źjaviłasia infarmacyja, što ŭ tuju ž siektu syšła jašče adna biełaruska.
Pakul viadoma tolki toje, što žycharka Baranavič Kaciaryna Hutyrčyk uziała dvaich małych dziaciej i źjechała ŭ Rasiju.
Kaciaryna Hutyrčyk
«Naša Niva» źviazałasia z mužam Kaciaryny. Mužčyna paviedamiŭ, što dziaciej užo viarnuli dadomu.
Ciapier jon znachodzicca ŭ Jekaciarynburhu, zajmajecca ci to pošukami žonki, ci to jaje vyzvaleńniem ź siekty. Padrabiazna kamientavać historyju mužčyna nie zachacieŭ.
Inšyja svajaki Kaciaryny Hutyrčyk taksama kateharyčna admovilisia ad kamientaraŭ.
Viadoma tolki, što jak i siamja Kazancavych, Hutyrčyk pavydalała ŭsie svaje akaunty ŭ sacsietkach. Niekalki tydniaŭ tamu jana ŭziała dziaciej i źnikła.
Ziemfira Hajnulina, jak jana sama pra siabie kaža, byłaja pradavačka, jakaja ŭ 2011 hodzie ŭ śnie adčuła «božy duch» i pačała prapaviedavać, źmiešvajučy biblejskija historyi z ułasnymi chvorymi vydumkami. Hajnulina taksama zapisvaje na videa svaje «chryścijanskija» śpievy pad hitaru, vykładvaje ich na Jutubie.
Cikava, što ŭ VK ci Adnakłaśnikach Hajnulina i jaje prychilniki vydalajuć svaje akaŭnty, zatoje rehistrujucca ŭ tvitary, dzie «prapaviedujuć». Tvitar-akaŭnty stvoranyja navat małym dzieciam.
Sama Hajnulina ŭ tvitary na ruskaj i anhlijskaj movach raspaviadaje bajki, naprykład, jak u jaje syna zachrasła kostka ŭ horle, a boh prymusiŭ jaje źniknuć. Usie tvitar-akaŭnty viaducca pad novymi «chryścijanskimi» imionami: Famar, David, Maryja… Ivan Kazancaŭ, jaki zasiek syna da śmierci, mieŭ imia «Piotr».