Suśvietnaja arhanizacyja achovy zdaroŭja (SAAZ) zaniepakojenaja rostam zachvorvańnia na adzior u śviecie. Jak adznačajecca ŭ dakładzie SAAZ, apublikavanym u čaćvier u Ženievie, u 2018 hodzie ad adzioru pamierli bolš za 140 tys. čałaviek, što amal na 20 tys. bolš, čym hodam raniej, piša tass.ru.
Na praciahu hoda było zarehistravana 353 236 vypadkaŭ adru, adnak u arhanizacyi ŭpeŭnienyja, što realnyja maštaby šmatkroć pieraŭzychodziać statystyku. Pavodle acenak SAAZ, u minułym hodzie ŭ śviecie na adzior zachvareli prykładna 9 młn 769 tys. 400 čałaviek, a pamierli 142,3 tys. U paraŭnańni z 2000 hodam, kolkaść tych, chto zachvareŭ źmienšyłasia bolš čym u try razy, a tych, chto pamior — amal u čatyry razy, adnak u paraŭnańni z 2017-m kolkaść chvorych vyrasła bolš čym na 2 młn čałaviek, a tych, chto pamior - amal na 20 tys.
U ZŠA zafiksavanyja samyja vysokija pakazčyki zachvorvańnia za apošniuju čverć stahodździa, čatyry jeŭrapiejskija krainy — Ałbanija, Vialikabrytanija, Hrecyja i Čechija zhubili u 2018 hodzie status dziaržaŭ, u jakich adsutničaje adzior. Najbolšaje pašyreńnie adzior atrymaŭ u Demakratyčnaj Respublicy Konha, Libieryi, Samali, Ukrainie i na Madahaskary. «Na hetyja piać krain prypadaje amal pałova ŭsich vypadkaŭ adzioru ŭ śviecie», — kanstatuje SAAZ.
Bolšaść tych, chto pamior ad adzioru składajuć dzieci va ŭzroście da piaci hadoŭ. «Užo sam fakt, što siońnia dzieci pamirajuć ad takich chvarob, jak adzior, jakija možna praduchilić pry dapamozie vakcynacyi, vyklikaje abureńnie i śviedčyć ab kalektyŭnym pravale ŭ pytańni abarony najbolš uraźlivych dziaciej u śviecie», - zajaviŭ hienieralny dyrektar arhanizacyi Tedras Adanam Hiebrejiesus. Jon zaklikaŭ suśvietnuju supolnaść inviestavać srodki «ŭ imunizacyju i ŭ jakasnuju achovu zdaroŭja».
Ekśpierty rasceńvajuć ciapierašni achop vakcynacyjaj u śviecie jak niedastatkovy dla praduchileńnia ŭspyšak adzioru.
Adzior — nadzvyčaj zaraznaje virusnaje zachvorvańnie. Jano pieradajecca pavietrana-kropielnym šlacham. Jaho asnoŭnyja simptomy na pačatkovym etapie nahadvajuć hryp: vysokaja tempieratura, kašal, čchańnie, hałaŭny bol. Zatym na skury źjaŭlajecca charakternaja syp. Chvaroba niebiaśpiečnaja ŭskładnieńniami ŭ vyhladzie atytu, pnieŭmanii, branchitu, encefalitu. Infiekcyja asłablaje imunitet i ŭ asobnych vypadkach moža pryvieści da śmierci chvoraha. Asabliva niebiaśpiečny adzior dla niemaŭlat i dziaciej małodšaha vieku.
