12 śniežnia ministr adukacyi Ihar Karpienka ŭziaŭ udzieł u Nacyjanalnym studenckim forumie, jaki prajšoŭ u Oršy. Razam sa studentami ministr zapuściŭ maładziožny YouTube-kanał pad nazvaj «U abjektyvie — moładź» (tak nazyvaŭsia i sam forum) — ale na YouTube vy jaho nie znojdziecie, paviedamlaje Tut.by. U čym sprava?
Fota: BiełTA.
— U Biełarusi zapuścili maładziožny YouTube-kanał pra žyćcio maładych ludziej, ich prablemy i zachapleńni. Start prajektu ŭ Oršy daŭ ministr adukacyi Ihar Karpienka razam z łaŭreatami konkursu «Błahaśfiera 1.0». Inicyjataram stvareńnia kanała «U abjektyvie — moładź» vystupiła Ministerstva adukacyi. Vypuskać videa chłopcy płanujuć jak minimum raz na dva tydni, — paviedamlaje «Radyjo Homiel FM».
Adnak, kali ŭvieści nazvu novaha kanała ŭ YouTube, pošuk vydaje staryja roliki, nijak nie źviazanyja z prajektam.
U pres-słužbie Ministerstva adukacyi paraili źviarnucca pa tłumačeńni ŭ Nacyjanalny centr mastackaj tvorčaści dziaciej i moładzi — mienavita hetaja ŭstanova zajmajecca stvareńniem YouTube-kanała dla biełaruskaj moładzi, choć na sajcie arhanizacyi pra novy prajekt pakul što niama nijakaj infarmacyi.
— Chłopcy, treba troški pačakać, kab usie zapuściłasia, — rastłumačyŭ načalnik adździeła pa pracy z moładździu centra Dźmitryj Turonak. — U nas jość rabočaja nazva, jakuju ja nie chaču afišavać, tamu vy nie znojdziecie jaho na YouTube. Nazva «U abjektyvie — moładź» studentam nie spadabałasia, tamu my prydumali inšuju nazvu. U nas jość kantent-płan, my chočam nabrać rolikaŭ na ŭvieś siezon. Jość hrafik vychadu siezonu.
— Kali pa hrafiku vychodzić pieršy rolik? — udakładnili my.
— Davajcie ja skažu, što paśla Novaha hoda, — adkazaŭ Turonak.
— Vy atrymali biudžetnaje finansavańnie na hety kanał?
— Nie, heta pakul što entuzijazm. Studenty zdymali na mabilnyja telefony.
Darečy, u pramacyjnym roliku kanała, jaki taksama nielha znajści na YouTube pa zapycie «U abjektyvie — moładź», uziali ŭdzieł viadomyja błohiery Uład Bumaha i Pryjemny Eldar.
Zahadčyk siektara pa ŭzajemadziejańni z hramadskimi abjadnańniami i arhanizacyjami centra Jaŭhien Juško taksama byŭ na mierapryjemstvie ŭ Oršy. Pavodle jaho słoŭ, forum i byŭ pryśviečany adkryćciu YouTube-kanała dla moładzi.
— Razam sa studentami my prydumali «šapku», napaŭnieńnie, kantent, rubryki. Raspracavali kantent-płan, źniali probnyja varyjanty. Na praciahu dvuch dzion byli majstar-kłasy. Źniali kala 30 rolikaŭ, ale jany pakul što nie dla raźmiaščeńnia, my prosta «prasunuli» studentaŭ u hetym kirunku, — kaža Jaŭhien Juško. — Zaraz my stvaryli pracoŭnuju hrupu, jakaja budzie hetym zajmacca [stvareńniem YouTube-kanała]. U ramkach forumu zrabili ŭsiu padrychtoŭčuju pracu. Kanał zapuściŭsia nie fizična, bo zapuścić jaho na YouTube — heta adna siekunda, naša zadača była zrabić jaho piśmienna i kruta. U nas jość kantent-płan. Zhodna z płanam, my robim dziesiać vypuskaŭ — i tolki paśla hetaha budziem stvarać i napaŭniać kanał.
