Marcin Pšydač, Forum
Pasła Rasii Siarhieja Andrejeva vyklikali ŭ Ministerstva zamiežnych spravaŭ Polščy ŭ suviazi z apošnimi vykazvańniami prezidenta RF Uładzimira Pucina. Pra heta paviedamlaje Biełsat sa spasyłkaj na namieśnika kiraŭnika polskaha MZS Marcina Pšydača.
U Polščy niezadavolenyja vykazvańniami Uładzimira Pucina i staršyni Dziaržaŭnaj dumy RF Viačasłava Vałodzina pra pryčyny Druhoj suśvietnaj vajny. Taksama ŭ Varšavie aburanyja zajavaj rasiejskaha prezidenta adnosna ambasadara Polščy ŭ Niamieččynie Juzafa Lipskaha.
«U svaich kamientarach jany [rasiejskija ŭłady] sprabujuć pamienšyć sumiesnuju adkaznaść Savieckaha Sajuzu za razbureńnie miru ŭ Jeŭropie. SSSR u 1939—1941 hadach byŭ sajuźnikam Hiermanii», — skazaŭ Marcin Pšydač.
Na jaho dumku, takija zajavy dakazvajuć, što mižnarodnyja namahańni dla asudžeńnia nie tolki nacysckaha, ale i savieckaha tatalitaryzmu ŭsio jašče nieabchodnyja.
U svaju čarhu ambasadar Rasiei ŭ Polščy Siarhiej Andrejeŭ pa vynikach sustrečy ŭ polskim MZS paviedamiŭ RIA «Novosti», što hutarka była «žorstkaja, ale całkam karektnaja».
«My nikomu nie dazvolim čytać nam natacyi», — skazaŭ jon.
19 i 20 śniežnia Uładzimir Pucin vystupiŭ u abaronu paktu Mołatava — Rybientropa. A 24 śniežnia jon nazvaŭ «svołačču i antysiemickaj śvińnioj» ambasadara Polščy ŭ Hiermanii, jaki paabiacaŭ u 1938 hodzie pomnik Hitleru za vysyłku habrejaŭ u Afryku.
