Alternatyŭny 1985 hod. Saviecki Sajuz brazhaje zbrojaj, u Złučanych Štatach – dyktatura ŭsienarodnaabranaha prezidenta Niksana, jaki pajšoŭ ažno na piaty termin. Śviet nakonadni jadziernaj katastrofy.
Nikomu nie patrebnyja byłyja supierhieroi viaduć žyćcio abyvatalaŭ. Paśla zabojstva adnaho ź ich – Kamiedyjanta – nieŭtajmavany Roršach viadzie vyšuk i ŭpeŭnieny, što na hierojaŭ abvieščana niehałosnaje palavańnie. Ale ŭsio jašče horš, čym možna było sabie ŭjavić…
Karcina Zeka Snajdera, jaki pastaviŭ komiks “300 spartancaŭ” – adzin z sama dziŭnych filmaŭ apošnich časoŭ. Amierykanskija komiksy, henyja kazki cemientnych haradoŭ – ź jaskravymi maskami, akreślenymi niahodnikami i stanoŭčymi hierojami – daŭno ŭžo pnulisia vyjści za miežy fantazijnaje terytoryi. U kazačnych hierojaŭ źjaŭlalisia frejdysckija kompleksy (“Betmen”), jany vučylisia teraryzmu i demahohii (“Ciomny rycar”) ci viali zmročnyja dziońniki “Horadu hrachoŭ”.
Stužka Snajdera pretenduje pretenduje na status antyŭtopii – z žorstkaj sacyjalnaj krytykaj. Antyvajennyja demanstracyja rasstralanyja, hratesknaja kupka palitykanaŭ vyrašaje los płaniety (Kubryk z “Doktaram Strendžłavam” paciešyŭsia by); rakiety čakajuć zapuska. A sami supierhieroi – hetyja vitryny amierykanskaj mary – zabivajuć dziaciej i ciažarnych (Kamiedyjant), atłuścieli i pakutujuć na impatencyju (Betmen), švendajucca ŭ aholena-fijaletavym vyhladzie dyj miedytujuć na Marsie (Doktar Mancheten) – ci, uvohule, psichapaty (Roršach).
Cytatna-aščerany hvałt u filmie zaškalvaje, miaža pamiž dakumientam i fikcyjaj źniščanaja, komiksavy seks naturalistyčna-bezavy. Zek Snajder pieraplunuŭ “Foresta Hampa” – alternatyŭny 1985 hod sa svajoj prydumanaj historyjaj vyhladaje stylova-zmročnaj realnaściu.
Heta vybuchovaja, jak jadziernaja bomba stužka – plama raspadu starych epasaŭ, ci paznaka novaha – jaki tolki stvarajecca.