 Ihar Čarniaŭski |
Razborka šerahu kamiennych pomnikaŭ architektury ŭ histaryčnym centry Minska tłumačycca abjektyŭnymi pryčynami,zajaviŭ 11 sakavika na pres‑kanfierencyi načalnik upraŭleńnia pa achovie historyka‑kulturnaj spadčyny i restaŭracyi Ministerstva kultury Biełarusi Ihar Čarniaŭski.
Pavodle jaho słoŭ, zabudova histaryčnaj častki Minska kamiennymi budynkami pačałasia, u asnoŭnym, u kancy XIX stahodździa paśla sieryi vialikich pažaraŭ, jakija źniščyli draŭlanyja pabudovy horada. U suviazi z zabaronaj uładaŭ budavać u hetaj častcy Minska budynki z dreva prykmietna vyras popyt na cehłu, što pryviało da źnižeńnia jaje jakaści.
Akramia taho, I.Čarniaŭski źviarnuŭ uvahu na vialikuju kolkaść ramontaŭ i rekanstrukcyj cahlanych budynkaŭ histaryčnaha centra stalicy, asabliva paśla Druhoj suśvietnaj vajny. «Tak, pry razhladzie prajektnaj dakumientacyi pa restaŭracyi kankretnych budynkaŭ ich ahlad pakazvaje, što ŭ kładcy vykarystana cehła troch‑čatyroch typaŭ», — raskazaŭ I.Čarniaŭski. Pavodle jaho słoŭ, padčas šmatlikich ramontaŭ i rekanstrukcyj šerah budynkaŭ stracili svoj pieršapačatkovy architekturny voblik.
Siarod prykładaŭ takoj dehradacyi pomnikaŭ načalnik upraŭleńnia nazvaŭ budynak pa Internacyjanalnaj, 13a. Kali, pavodle jaho słoŭ, try‑čatyry hady tamu hetaje zbudavańnie ŭjaŭlała saboj niepryhožuju dvuchpaviarchovuju karobku, to paśla razborki nieaŭtentyčnych častak ścien budynku byŭ viernuty pieršapačatkovy voblik.
