Minčuk zabiraŭ u minakoŭ bankaŭskija karty i hrošy, pradstaŭlajučysia milicyjanieram, paviedamlaje MUS.
U stalicy supracoŭniki pa baraćbie z kibierzłačynstvami pry siłavoj padtrymcy AMAPa zatrymali 32-hadovaha mužčynu, jaki pad vyhladam supracoŭnika pravaachoŭnych orhanaŭ spačatku abšukvaŭ ludziej, a zatym prysabiečvaŭ ich hrošy i bankaŭskija karty.
Adno z paviedamleńniaŭ u milicyju pastupiła ad naviedvalnika čyhunačnaha vakzała ŭ Minsku. Hramadzianin raspavioŭ, što ŭ chole da jaho padyšoŭ nieviadomy, pradstaviŭsia milicyjanieram i pakazaŭ dakumient, jaki nahadvaje słužbovaje paśviedčańnie. Psieŭdasupracoŭnik milicyi pry hetym skazaŭ, što hety hramadzianin padobny pa prykmietach da złačyncy, i pačaŭ dahladać asabistyja rečy «zatrymanaha». U vyniku jon kanfiskavaŭ u jaho hrošy i bankaŭskuju kartu.
Pa patrabavańni «pravaachoŭnika» paciarpieły paviedamiŭ pin-kod dla identyfikacyi ŭładalnika karty. Kali nieabchodnyja źviestki byli nibyta «pravierany pa bazie», «milicyjanier» pakłaŭ kartu ŭ kašalok paciarpiełaha. Paźniej vyśvietliłasia, što jon jaje niezaŭvažna zamianiŭ na inšuju.
Apieratyŭniki vyśvietlili, što takuju złačynnuju schiemu zatrymany ździajśniaŭ kala miesiaca, užo znajšli niekalkich achviar. Nie vyklučana, što padmanutych ludziej moža być bolš.