Hanna apublikavała zapisku ŭ instahramie. Ludzi adhukalisia nie tolki dziela taho, kab dapamahčy sabačkam, a prapanavali miesca žycharstva i samomu Siarhieju.
Hanna raspaviała historyju Siarhieja i 10 ščaniukoŭ «Našaj Nivie»:
«Ź Siarhiejem ja zavočna znajomaja prykładna hod. Ja žyvu ŭ pryvatnym siektary ŭ horadzie. Niepadalok ciepłatrasa. Niejak zaŭvažyła, što tam pasialiŭsia čałaviek. Jamu kala 50 hadoŭ, zaŭsiody čysty, vietlivy. Jon staŭ dapamahać susiedziam z ramontam. Niešta zrobić, jamu naljuć talerku supa. Ź im moj muž bolš kantaktavaŭ, cyharetami častavaŭ. Raskazaŭ, što viedaje tolki toje, što Siarhiej pryjechaŭ u Barysaŭ z Homiela», — raskazvaje Hanna.
Mužčyna pieryjadyčna źnikaŭ, paśla źjaŭlaŭsia znoŭ.
Čatyry dni tamu Hanna na śmietnicy niepadalok ad svajho doma zaŭvažyła sabačku, pry jakim byli dziasiaciora ščaniukoŭ. Tut ža byŭ i Siarhiej.
«Jon mnie kaža, što padkormlivaje ich tut. Łazić pa śmietnicy, źbiraje kostki dla sabački i jaje dzietak. Za kapiejki, jakija znachodzić, abo za tyja, što padkidajuć jamu ludzi, kuplaje ŭ kramie małako dla ščaniukoŭ», — raskazvaje Hanna.
Žančyna vyrašyła, što terminova treba prystroić ščaniukoŭ u dobryja ruki.
«Ja dniom na pracy. Siarhiej mnie kaža: «Ja mahu razdavać ščaniukoŭ». Ja pryniesła z domu košyk, my zaścialili jaho. Siarhiej z hetym košykam chodzić da rynku i prapanoŭvaje ščaniukoŭ ludziam. Ciapier, ahulnymi namahańniami, my znajšli dom šaści ź ich», — kaža Hanna.
Kali fota zapiski trapiła ŭ internet, adazvalisia ludzi, jakija chočuć dapamahčy samomu Siarhieju.
«Ja skazała Siarhieju, što jon staŭ zorkaj. Napisała žančyna, u jakoj pryvatny dom za 30 kiłamietraŭ ad Minska. Jana kaža, što Siarhiej moža tam žyć. Bolš za toje, kali jon tak lubić žyvioł, to moža arhanizavać tam štości nakštałt prytułku. Taksama ludzi prapanoŭvajuć Siarhieju hrošy. A jon adkazvaje: «Ja jašče i vieršy mahu pisać. Hrošy mnie nie tak patrebnyja, jak praca. Ja ž zdarovy, mahu zarabić sabie sam. Adzieńnie? A ja jaho ŭ sacyjalnym centry biaspłatna atrymlivaju», — pieradaje słovy Siarhieja Hanna.
Ci pahadziŭsia jon na prapanovu pierajechać na novaje miesca žycharstva, Hanna paabiacała raskazać, jak tolki ŭdakładnić heta pytańnie ŭ samoha Siarhieja.
