@aisultannazarbayev
Unuk pieršaha prezidenta Kazachstana Nursułtana Nazarbajeva Ajsułtan Nazarbajeŭ, jaki sprabavaŭ zabić siabie i atrymaŭ hod umoŭnaha terminu za napad na palicejskaha ŭ Łondanie, paprasiŭ u Vialikabrytanii palityčnaha prytułku. Pra heta jon paviedamiŭ na svajoj staroncy ŭ Facebook, piša lenta.ru.
Unuk byłoha kazachstanskaha lidara patłumačyŭ svajo rašeńnie ciskam z boku siamji. Jon zajaviŭ, što vałodaje infarmacyjaj «ab vysokamaštabnaj karupcyi pamiž uradami Rasii i Kazachstana». Pry hetym Nazarbajeŭ-małodšy adznačyŭ, što ŭsie padrabiaznaści jon raspavioŭ u intervju brytanskamu vydańniu Times, jakoje budzie apublikavana ŭ najbližejšy čas.
Raniej Ajsułtan Nazarbajeŭ zajaviŭ, što jaho chočuć zabić. Jon raspavioŭ, što znachodzicca ŭ anhlijskaj balnicy, byŭ u turmie i mieŭ prablemy sa svajakami.
U lipieni 2019 hoda Ajsułtan u Łondanie ukusiŭ kanstebla, jaki sprabavaŭ pieraškodzić jamu pakončyć z saboj. 30-hadovaha ŭnuka pieršaha prezidenta Kazachstana prysudzili da hoda ŭmoŭna, 140 hadzin hramadskich prac, štrafu i kampiensacyi škody ŭ niekalki tysiač funtaŭ sterlinhaŭ, a taksama abaviazali prajści lačeńnie ad narkazaležnaści — naviedać jak minimum 20 siesij u narkołaha.
Jaho baćka Rachat Alijeŭ da 2008 hoda byŭ žanaty z dačkoj Nazarbajeva Daryhaj. U 2015-m jon byŭ znojdzieny miortvym u aŭstryjskaj turmie, dzie znachodziŭsia pa abvinavačvańni ŭ zabojstvie dvuch top-mieniedžaraŭ Nurbanku. U Kazachstanie Alijeva abvinavačvali ŭ padrychtoŭcy da zachopu ŭłady i arhanizacyi złačynnaj hrupy i zavočna prysudzili da 40 hadoŭ turmy. Kazachstan dvojčy pasyłaŭ u Aŭstryju zapyt na jaho ekstradycyju, ale atrymlivaŭ admovu.
