U studzieni na fonie skaračeńnia naftapierapracoŭki VUP Biełarusi ŭpaŭ na 1,9% adnosna studzienia minułaha hoda. Ci baluča heta dla našaj ekanomiki? «Naša Niva» pacikaviłasia ŭ ekśpiertaŭ.
Ekanamist Siarhiej Čały adznačaje, što heta istotny minus.
«Ale treba razumieć, što heta papiarednija ličby. Pa vynikach kvartała VUP budzie padličvacca jašče raz, i tady ŭžo buduć dakładnyja pakazčyki», — kaža ekśpiert.
Čakać, što VUP budzie źnižacca na praciahu ŭsiaho hoda, nie varta — pieramovy pa nafcie nie zaciahnucca nastolki, miarkuje Čały. Ale, vierahodna, nam nie ŭdasca dasiahnuć prahnoznych pakazčykaŭ pa vynikach hoda (ułady prahnazavali, što za 2020-y VUP vyraście na 2,8%). Biełarusi heta pahražaje adstavańniem pa ŭzroŭni žyćcia ad susiednich krain.
Značnym padzieńnie VUP nazyvaje i ekanamist Dźmitryj Kruk.
«Kali b z naftapierapracoŭkaj usio było dobra, to, chutčej za ŭsio, ekanomika rasła b — na ŭzroŭni ad 1% da 2%. Tamu straty ŭ formie VUP navat bolš značnyja. Toje, što my majem zaraz, vielmi baluča. Bo dla nas rost VUP vielmi krytyčny i nieabchodny»,
— kaža Dźmitryj Kruk.
Ale jon nie ličyć situacyju katastrofaj. Mahčyma, pa vynikach hoda pakazčyk udasca vyraŭniać i padzieńnie ŭ studzieni budzie nie tak bačna — usio zaležyć ad naftavaha scenara, jaki budzie pryniaty.
«Siońnia hałoŭnaja zadača — praduchilić niehatyŭnyja tendencyi VUP. My budziem vymušany pierahledzieć karennym čynam pracu naftapierapracoŭki, kab hetyja straty ŭ VUP nie mieli sacyjalnych i palityčnych nastupstvaŭ».
Ekanamist ličyć, što padzieńnie VUP u studzieni adabjecca na zarobkach tolki ŭ halinach, niepasredna źviazanych z naftapierapracoŭkaj. Astatnich pakul nie zakranie. Ale kali šok praciahniecca, niasoładka stanie ŭsim. Tamu važna chutčej vyrašyć pytańnie.
«Na moj pohlad, situacyja niavyznačanaści sama pa sabie viadzie da bolš istotnaha prasiadańnia i bolšych strataŭ u VUP», — padsumoŭvaje ekśpiert.
