U ramkach kampanii za pavyšeńnie naradžalnaści ŭrad Vienhryi časova nacyjanalizavaŭ niekalki klinik, jakija śpiecyjalizujucca na ekstrakarparalnym apładnieńni.
Urad Vienhryi ŭkładzie miljonnyja sumy ŭ pašyreńnie hetych klinik, paviedamlajuć vuhorskija ŚMI. Demahrafičnaja prablema stała pryjarytetam.
«Kali my chočam, kab naradžałasia bolš vienhierskich dziaciej, a nie imihrantaŭ, adzinaje vyjście — heta jak maha bolš vydatkoŭvać na padtrymku siamji», — zajaviŭ Viktar Orban, kiraŭnik urada krainy. Lidar nacyjanał-kansiervataraŭ zastajecca va ŭładzie ŭžo treci termin zapar.
Vienhryja naležyć da tych krain Jeŭropy, dzie demahrafičny spad pačaŭsia jašče na zaranku 80-ch, u adroźnieńnie ad Biełarusi, dzie jon rehistrujecca ad 1993 hoda. Raniejšyja zachady nie źmianili hetaj tendencyi.
Urad Orbana vyzvaliŭ ad padatkaŭ maci siamiej, u jakich bolš za čaćviora dziaciej, a taksama stvaryŭ sistemu supierilhotnaha kredytavańnia dla siamiej ź dziećmi.
Ale nacyjanalizacyja amal usich klinik EKA — heta krok biesprecedentny.
U dekrecie ab hetaj miery havorycca, što kliniki padlahajuć nieadkładnaj nacyjanalizacyi dziela «vykanańnia dziejnaści, jakaja maje stratehična važny dla nacyi charaktar». Z 1 lutaha ŭsie pracedury EKA buduć całkam pakryvacca sa srodkaŭ fondu sacabarony — pryčym biez abmiežavańnia kolkaści razoŭ.
Inšyja krainy Centralnaj Jeŭropy taksama ŭviali zachady z metaj spynić adpłyŭ ludziej i pavialičyć naradžalnaść. Tak, ekanamičnyja pośpiechi Polščy dazvolili polskamu ŭradu značna pavysić sacyjalnyja vypłaty. Ciapier kožnaja polskaja siamja atrymlivaje 130 dalaraŭ štomiesiačnaj dapamohi dla kožnaha dziciaci da 18 hadoŭ žyćcia, takaja ž suma idzie dla ludziej z abmiežavanymi mahčymaściami. Akramia taho, $75 vypłačvajucca kožnamu školniku štohod napiaredadni 1 vieraśnia, a maładyja ludzi płaciać 0% padachodnaha padatku da 26 hadoŭ.
Da taho, i Polšča, i Vienhryja aktyŭna namahajucca pieraciahvać da siabie na žycharstva ludziej svajoj nacyjanalnaści z dyjaspary.
Nasielnictva Biełarusi taksama skaraciłasia prykładna na miljon čałaviek za apošnija 25 hadoŭ.
