A prykramloŭskaja presa ŭ dzień rasijska-biełaruskich pieramovaŭ adznačaje: sabiekošt Biełarusi jak sajuźnika praciahvaje raści.
Napiaredadni sustrečy Alaksandra Łukašenka z prezidentam Rasii rasijskaja presa aktyŭna abmiarkoŭvaje jeŭrapiejski hambit hałoŭnaha sajuźnika Maskvy i zadajecca pytańniem, što budzie rabić stratehičny sajuźnik Rasii dalej dy kolki ž nasamreč kaštuje braterskaja luboŭ Biełarusi.
Tak, razhladajučy z dapamohaj ekśpiertaŭ apošnija tendencyi ŭ zamiežnaj palitycy spadara Łukašenka, «Niezavisimaja hazieta» u artykule «Łukašenka miž Uschodam i Zachadom» robić vysnovu, što Rasii, dla taho, kab utrymać Biełaruś u svaich sajuźnikach, spatrebiacca značnyja finansavyja ŭlivańni.
Ekśpierty, apytanyja NH, vykazali mierkavańnie, što izalacyja Biełarusi ŭžo ŭ minułym, sama «palityka bałansavańnia pamiž Uschodam i Zachadam efiektyŭnaja»,a sabiekošt Biełarusi jak sajuźnika praciahvaje raści. U jakaści vysnovy «NH» cytuje adnaho z apytanych ekśpiertaŭ, jaki zrabiŭ prahnoz, što pakul u Rasii nie budzie raspracavana stratehija datyčna adnosin ź Biełaruśsiu, «Łukašenka jak łaskavaje cialatka, moža dźvie matki ssać».
U svaju čarhu Hazieta.ru infarmuje, što ES dazvoliŭ Alaksandru Łukašenka ŭjezd u Jeŭropu i robić vysnovu, jakaja prezidentu Biełarusi ŭžo viadoma – ES žadaje ź im siabravać. Jak paviedamiła vydańnie sankcyi suprać 42 biełaruskich čynoŭnikaŭ na čale z prezidentam byli jašče raz prypynieny na pasiedžańni ministraŭ zamiežnych spraŭ ES u Bruseli, na hety raz terminam na 9 miesiacaŭ.
Razhladu vynikaŭ rašeńnia 27 ministraŭ zamiežnych spraŭ ES i biełaruska‑ieŭrapiejskich «hulniaŭ» dla biełaruska‑rasijskich adnosin zaniaŭsia «Kommiersant». Jak piša hazeta, ES pajšoŭ nasustrač Biełarusi, niahledziačy na ihnaravańnie biełaruskimi ŭładami šerahu patrabavańniaŭ, i rašeńnie ES dać Minsku «jašče adzin šaniec» dazvolić Łukašenka hrać i dalej na supiarečnaściach pamiž Zachadam i Maskvoj.
«My pavinny dać šaniec biełaruskamu narodu, bo ŭ advarotnym vypadku cisk Rasii (na Biełaruś) budzie ŭzrastać», — cytuje słovy ministra zamiežnych spraŭ Estonii «Kommiersant».
Situacyja ŭ trochkutniku Biełaruś‑Rasija‑ES, jakuju stvaryŭ sam Łukašenka, jaho ž całkam zadavalniaje, — miarkuje hazieta, bo dazvalaje atrymlivać finansavuju dapamohu ad abodvuch bakoŭ, ale vydańnie sumniajecca, što baki (i ŭ pieršuju čarhu Rasija) buduć doŭha ciarpieć dvajnyja hulni Łukašenka, a raźviazka moža nastupić užo ŭ traŭni padčas samitu ES u Prazie i nie na karyść biełaruska‑ieŭrapiejskich adnosin.
Adnak
ź mierkavańniami mejnstrymaŭskaj presy nie pahadžajecca Kasparov.ru, jaki ŭžo bačyć Biełaruś praź piać hod staršynioj Rady Jeŭropyi daje adkaz na pytańnie, čamu navat «apošni jeŭrapiejski dyktatar» razvaročvaje svaje łyžy ŭ bok Jeŭropy. Śćviardžajučy, što apošni farpost Rasii ŭ Biełarusi ŭ chutkim časie padzie, Kasparov.ru piša, što pryčynaj hetaha źjaŭlajecca žadańnie Łukašenka zachavać uładu lubymi srodkami i Rasija ź jaje «suvierennaj demakratyjaj» źjaŭlajecca bolšaj pahrozaj dla ambicyj prezidenta Biełarusi, čym jeŭrapiejskaja libieralnyja kaštoŭnaści. I, choć vybar Łukašenka jašče nie zrabiŭ, Kasparov.ru dałučajecca da armii fanataŭ navykaŭ palityčnaj mimikryi kiraŭnika Biełarusi.
