facebook.com/globel24/
Paštovy apieratar «HłoBieł24» abviaściŭ pra zakryćcio biźniesu. Pra heta TUT.BY paviedamili supracoŭniki i klijenty kampanii.
— U minułuju piatnicu kiraŭnik napisaŭ u čat, što «naša kampanija ŭ suviazi ź finansavymi ciažkaściami vyrašyła pačać praces likvidacyi». Jon taksama paviedamiŭ, što «pracujem apošni tydzień, a potym kampanija spyniaje svaju dziejnaść». Piersanału jon prapanavaŭ: abo «pišycie zajavy pa ŭłasnym žadańni, abo vašy pracoŭnyja buduć u nas, pakul praces likvidacyi nie budzie zavieršany, a ŭvieś hety čas vy budzicie znachodzicca ŭ nieapłatnym adpačynku», — skazała supracoŭnica «HłoBieł24».
Pavodle jaje słoŭ, «ničoha nie pradrakała biady, kampanija dynamična raźvivałasia».
Klijenty «HłoBieł24» atrymali paviedamleńni ab skasavańni dahavoraŭ na akazańnie pasłuh (paštovaj suviazi, kurjerskich pasłuh, pasłuh transpartnaj ekśpiedycyi, pieravozki) u adnabakovym paradku. Na praciahu 9-12 sakavika kampanija płanuje vykanać uziatyja abaviazacielstvy, a zatym spynić svaju dziejnaść.
— Heta była adna z samych cikavych, hnutkich, zručnych i dynamičnych słužbaŭ dastaŭki. Tamu ich paviedamleńnie było niečakanym, jak hrom siarod jasnaha nieba, — kažuć u adnoj ź internet-kram, u jakoha była zaklučana damova z «HłoBieł24».
Udzielniki rynka ličać, što kankurentny rynak dastaŭki ŭ Biełarusi tolki pačaŭ farmavacca, tamu «vielmi škada, što na adnaho cikavaha hulca stanie mienš». Jany spadziajucca, što «takija kampanii, jak «Biełpošta», DPD abo toj ža «Jeŭraopt» zmohuć prapanavać jakasnyja pasłuhi pa razumnych cenach».
«HłoBieł24» pačaŭ svaju dziejnaść u 2014 hodzie. Paštovy apieratar mieŭ šyrokuju sietku z 52 adździaleńniaŭ u 45 haradach Biełarusi, havorycca na sajcie kampanii. U kampanii pracuje kala 100 čałaviek.
