Alaksandr Łukašenka, dajučy zhodu na naznačeńnie kiraŭnikoŭ miascovych orhanaŭ ułady, zaklikaŭ ich biez paniki budavać svaju pracu ŭ suviazi ź situacyjaj z karanavirusam, pieradaje BIEŁTA.
«Vyklikaŭ vielmi šmat. Vy bačycie: śviet zvarjacieŭ ad karanavirusa abo, moža być, na asnovie hetych usich razvah pa karanavirusie.
Ale dla nas nie heta hałoŭnaje i strašnaje. My hetyja virusy pieražyvali, pieražyviem i hety.
Byli i paskładaniej virusy: i śviny, i ptušyny, i atypovaja pnieŭmanija. Potym achkali i vojkali, adkul heta źjaviłasia: voś, bačycie, ŚMI vinavatyja, što jany zanadta šyroka i nie tak aśviatlali prablemy. Napeŭna, i ŭ hety raz ŚMI abvinavaciać praź miesiac-druhi. Choć i da ich pretenzij niamała», — adznačyŭ Łukašenka.
Na jaho dumku, u Biełarusi adekvatna reahujuć na pahrozy. Miedyki ŭžo daŭno prymajuć kropkavyja miery, i sami biełarusy ŭ cełym adekvatna reahujuć na situacyju, zaŭvažyŭ Alaksandr Łukašenka.
«Biełarusy prosta małajcy. Za vyklučeńniem adnaho vypadku: nie biehajcie pa aptekach i nie skuplajcie maski, śpiecvopratku ci niejkija leki», — skazaŭ kiraŭnik dziaržavy.
Paśla taho, jak u krainie rezka vyras popyt na miedycynskija maski, ajčynnyja pradpryjemstvy byli aryjentavany na pavieličeńnie abjomaŭ ich vytvorčaści. Jak raskazaŭ Łukašenka, pra situacyju jamu dakładvaŭ premjer-ministr.
Akazałasia, što ciapier niama kudy padzieć vypuščanuju pradukcyju.
«Pašyli — padzieć niama kudy. Lehpram patrabuje: apłacicie nam. A achova zdaroŭja kaža: nam stolki nie treba, nam niama kudy padzieć. Praŭda, ja jamu skazaŭ, što treba razhortvacca: u Hiermanii nie chapaje śpiecadzieńnia, masak. Treba pradać ich, kali na ich jość popyt», — dadaŭ Alaksandr Łukašenka.
Pavodle jaho słoŭ, akramia Minsku i bujnych haradoŭ, situacyja z karanavirusam nie takaja prablema dla rajonaŭ i rajonnych centraŭ. «Samaja vialikaja dla nas (nie prablema, a adkaznaść) — heta ekanomika. Na žal, usie hetyja ruchi ŭ kirunku karanavirusa vielmi rezka adbilisia na ekanomicy. Dajšło da taho, što naša rodnaja Rasija — padkreślivaju — zakryła miažu ź Biełaruśsiu», — adznačyŭ kiraŭnik dziaržavy.
U toj ža čas jon kanstatavaŭ, što ŭ Biełarusi adnosna spakojnaje stanovišča, a «Rasija ŭsia pałaje ad karanavirusa» [u Rasii pa stanie na ranicu 16 sakavika — 64 vypadki — NN]. «Dyk chto ad kaho pavinien začyniacca. Pytańnie rytaryčnaje», — dadaŭ jon.
Alaksandr Łukašenka zaklikaŭ miascovyja orhany ŭłady biez usialakaj paniki pracavać ź ludźmi, nahadvajučy im pra miery zaściarohi.
