Kitaj raspracavaŭ vosiem vakcyn ad karanavirusa novaha typu, niekatoryja ź ich užo pakazali svaju efiektyŭnaść na žyviołach. Pra heta paviedamiła ŭ aŭtorak na bryfinhu navukovy supracoŭnik Instytuta daśledavańnia łabaratornych žyvioł pry Akademii miedycynskich navuk Cyń Čuań, piša TASS.
«Ciapier Akademija miedycynskich navuk pravodzić acenku efiektyŭnaści vaśmi vakcyn. Raboty pa acency efiektyŭnaści častki ź ich užo paśpiachova zavieršany», — skazała jana.
Jak adznačyła śpiecyjalist, testy pravodziacca na transhiennych myšach i makakach. Ciapier pravodzicca acenka mahčymych pabočnych efiektaŭ prymianieńnia preparataŭ i ich biaśpieki. Pa słovach Cyń Čuań, pry dapamozie testaŭ na žyviołach navukoŭcy taksama vyjaŭlajuć lekavyja srodki, najbolš efiektyŭnyja suprać pnieŭmanii, a taksama vyjaŭlajuć asnoŭnyja sposaby pieradačy karanavirusa.
Jak adznačyŭ na tym ža bryfinhu dyrektar departamienta navuki i techniki Ministerstva adukacyi KNR Łej Čaoczy, Kitaj nieŭzabavie moža prystupić da kliničnych vyprabavańniaŭ vakcyn, raspracavanych vyšejšymi navučalnymi ŭstanovami krainy. «Raspracoŭki vakcyn ad karanavirusa novaha typu ŭ vyšejšych navučalnych ustanovach Kitaja paśpiachova ruchajucca. Jość nadzieja, što ŭ samyja karotkija terminy pačnucca kliničnyja vyprabavańni častki ź ich», — ukazaŭ jon.
Pry hetym abodva śpikiery nie ŭdakładnili terminy pačatku kliničnych vyprabavańniaŭ.
